Shillong, Lber 04: Ka kynhun jong ki 3 ngut ki MLA na South Garo Hills hapoh ka jingialam u Myntri Sorkar Rakkam A Sangma hynne ka sngi Ba-ar, ki la aiti ia ka dorkhas sha u Myntri Rangbah ka Jylla Conrad K Sangma na ka bynta ban pynpoi ia ka lynti rel na Guwahati lyngba ka Mendipathar sha Baghmara bad Dhaka, Bangladesh.
“Ngi kyntu da ka jingsngewrit bad da ka jingburom ia ka ophis jong phi ban sngewbha ban shim ïa kane ka kam bad ka tnat Railway ka Sorkar India na ka bynta ban pynrung ha ka National Railway Development Plan ban pynwandur bad pynurlong ïa kane ka projek ka ban pynïasoh daka lynti Rel shaduh Baghmara” ong u Rakkam haka Dorkhas.
U Rakkam u la ong ba kane kan plie lad shisha ïa ka Global Tourism Integration ha kylleng ki Ri kiba don hapoh ka SAARC, BIMSTEC, ASEAN bad ki Ri hapoh ka Indo-Pacific.
“Ka lad pyniasoh kaba biang kan pynkiew ym tang ïa ka jingïatreilang ha ka liang ka ioh ka kot hynrei kan ïarap ruh ban tei ïa ka jingïadei kaba khlaiñ ha ka kolshor bad ka pule puthi hapdeng ka India bad ka Bangladesh. Ngi ngeit skhem ba kane ka lynti rel ka lah ban long ka ba wanrah jingkylla ha ka ban kyntiew ia ka roi ka par ha ka thain. Ngi ngeit ba phin pyrkhat bha ïa kane ka jingkyrpad bad shim ïa ki sienjam kiba donkam ban sdang ïa ka jingïakren bad ka tnat Railway ka Sorkar Pdeng na ka bynta ban pyntreikam ha ka por kaba biang ïa kane ka projek kaba kongsan” u la bynrap.
Ka dorkhas ka ong ba ka jingpyniasoh daka Rel ka lah ban long ka nongkynti kaba kongsan bha ia ka thaiñ bad kan ai jingmyntoi ym tang ia ka Jylla hynrei ia ka bynta jong ka thain shatei lammihngi bad ka Ri baroh kawei.
Ka jingjngai hapdeng ka Baghmara bad ka Mymensing, ka dei kaba jan tam na ka bynta ka jingpynïasoh Rel hapdeng ka Ri India bad ka Ri Bangladesh.
Ka lynti Rel ka don ka jinglah kaba khraw ban pynsuk ia ka khaii pateng ha ka pyrthei, ban pynshlur ia ka kam jngohkai pyrthei, bad ban kyntiew ia ka jingiasam ia ka pule ka dangle hapdeng ki 2 tylli ki Ri.
Shwa ban ioh ia ka jinglaitluid, ka India bad Bangladesh ki iasam ia ka jingiadei kaba khlain bha ha ka khaii pateng, khamtam eh lyngba ki rukom iadie iathied.
