“Ngi la dep rai lut ba ngim kwah leit sha Assam”: Serbilin
Nongstoiñ, Risaw 10: Ka Synjuk ki Nongsynshar Shnong ka Nongmynsaw Syiemship, kila aiti da ka dorkhas sha ka Sorkar Jylla ba dawa ban iasaid tyngeh bad ka Sorkar Assam ha ka jingiapynbeit pud jong ka wat kaba-ar ban pynhap ia ki 42 tylli ki Shnong ka thain Langpih sha Meghalaya ym ban phah leit sha Assam.
Kine ki Khlieh Nongsynshar Shnong kila aiti ia kane ka dorkhas sha u Deputy Commissioner ka West Khasi Hills Bah Garod SN Dykes hynne ka sngi Nyngkong.
Ha kane ka dorkhas la jer kyrteng ruh ia baroh ki Shnong ki Thaw kiba kwah ban sah hapoh u pud u sam jong ka Jylla Meghalaya bad la suh lang ia ki rai bad ki jingiakut jong ki 42 tylli ki Dorbar Shnong ba kynthup ia ki shnong Khasi bad Garo kiba kwah ban don ha Meghalaya.
Lah ban kdew hangne ba ka sorkar Meghalaya kala dep thaw ia lai tylli ki Regional Committee-ka West Khasi Hills, Ri-Bhoi bad Jaintia Hills District, ki ban pyniaid noh shakhmat ia ka jingiakren pynbeit pud jong ka wat ba-ar na ka bynta ki hynriew tylli ki jaka ba jur ka jingiakajia bala buhteng ha ka jingiapynbeit pud ba nyngkong. Kine ki hynriew tylli ki jaka ki kynthup ia ka Langpih, Block-I bad Block-II.
Haba iakren bad Ka Shlem, u Bah Serbilin Lyngdoh, Secretary ka Synjuk ki Khlieh Nongsynshar Shnong ula pyntip ba u Deputy Commissioner ula kular ba un sa khmih bniah ia kane ka dorkhas bad un sa phah ruh sha ka Regional Committee jong ka West Khasi Hills ba kan leh ia kaba donkam.
“Ngi la wanrah hangne їa ka rai jong ki paidbah Khasi bad Garo ba ngi kum ki nongshong shnong ha khappud West Khasi Hills, bangi la rai ba da long kumno kumno ruh ngi te ngin neh beit ha la ka jong ka Jylla Meghalaya, kumba la їa rai paidbah ha ki dorbar shnong. Ngi kyrmen ba ka sorkar lyngba ki Regional Committee kin sngap їa ka sur jong ki paidbah”, ong u Bah Serbilin Lyngdoh.
U Bah Serbilin u pyntip ba kat kum ka jingong u Deputy Commissioner, ka Regional Committee bala thaw da ka sorkar kan sa khot ia ka jingialang bad baroh ki kynhun kynthup ki Khlieh Nongsynshar ha Nongstoin ban iaphylliew jingmut lang halor ka jingiapynbeit pud hashuwa ban sdang ka jinghiar jurup ia u pud u sam bad ka jingiakynduh ia ki nongshongshnong.
U pyntip ba hadien kane ka jingialang, ka Sorkar kan sap hah ia ki Ophisar na ka District kynthup ki Magistrate ba kin hiar sha ki shnong khappud ban lum ia ki jingtip ba bniah ha kaba iadei bad ki map jong ki shnong ki thaw, ki skhim sorkar bala pyntrei ha ki shnong bad ka jingkwah jong ki paidbah.
U Bah Serbilin u iathuh ba u Deputy Commisioner ula pyntip ba ka Regional Committee kan sa pynbeit noh shen ia ka Tarik jong ka jingialang .
