Shillong, Nailur 04 : Ka Jaintia Students’ Union (JSU) kala aiti ia ka dorkhas ha u Lat ka Jylla CH Vijayashankar ba kyrpad ia u ban iakren bad ka Sorkar Pdeng bad Sorkar Jylla, ha ka ban pynbna ia ka Jowai kum ka Summer Capital ka Jylla, ban pyntreikam noh mardir ia ka Inner Line Permit (ILP) bad ban shong bishar bniah biang ia ka Instrument of Accession (IOA) ba iasoi ha ka 17 tarik Nailar, 1948.
“Ngi dawa ban pynbna ia ka Jowai kum ka Summer Capital ka Meghalaya, ka ban iaid lang bad ka jingiakren halor ka Tura kum ka Winter Capital (kaba dang shong bishar da ka All Party Committee 2025). Kane kan kyntiew ia ka ri-lum Jaintia, ka Iing jong ki Pnar, War, Bhoi bad ki Biate hapoh ka Jaidbynriew Hynniewtrep, ban pynthikna ia ka jingiaryngkat kum ki Jaidbynriew” ong ka JSU ha ka dorkhas.
Kala ong ruh ba ka jingpynbna iaka Jowai kum ka Summer Capital kan kyntiew ia ka jinglong mar ryngkat jong ki jaitbynriew, kan kyntiew ia ka jingkynshew, bad kan kyntiew ia ka kam jngohkai pyrthei ha ka thain. Ki kdew ia ka jinglong tynrai jong ka Jowai, ka jinglong ba la pynkhreh ha ka liang ka jingsynshar, bad ki jingdonkam ha ka roi ka par kum ki daw ba kongsan kiba kyrshan ia ka jingtyrwa.
Ka JSU kala kyrpad ruh ia u Lat ban tuklar ha kaban pynkloi noh ia ka jingpyntreikam ia ka ILP ha Meghalaya, kaba la sah teng naduh ba ka Iingdorbar Thaw Ain ka Jylla kala mynjur ia ka resolution ha u snem 2019. Kila pynpaw ba ka ILP kan tehlakam ia ka jingrung kyrteng ki briew ba nabar, kan ai jingiada ia ka jinghiar pateng ka khyndew ka shyiap bad ka kolshor jong ki jaidbynriew trai ri ha ri-lum Jaintia.
Nalor kane, ka JSU kala kyntu ban bishar biang ia ka Instument of Accession (IOA) ban pynkhlain ia ka jingiada ia ki jaka ba hap hapoh ka Sixth Schedule bad pynthikna ia ka jinglaitluid ki trai riewlum. Kila kam ba ka IOA ka kular ia ka jingsynshar hi ki trai riewlum halor ka khyndew ka shyiap bad ka riti dustur, hynrei ka jingkyntur pud ka donkam ban hap pynskhem biang ha ri-lum Jaintia.
 kala aiti ia ka dorkhas ha u Lat ka Jylla CH Vijayashankar ba kyrpad ia u ban iakren bad ka Sorkar Pdeng bad Sorkar Jylla, ha ka ban pynbna ia ka Jowai kum ka Summer Capital ka Jylla, ban pyntreikam noh mardir ia ka Inner Line Permit (ILP) bad ban shong bishar bniah biang ia ka Instrument of Accession (IOA) ba iasoi ha ka 17 tarik Nailar, 1948.){kind=link}