SHILLONG, Risaw 27: U myntri ka tnat pynroi sor u bah Sniawbhalang Dhar ula ong ba hadien shi bnai ka Harijan Panchayat Committee (HPC) kan sa jubab iaka jingtyrwa ka sorkar jylla haba iadei bad ka jaka shna jaka sah iaki.
Lah ban kdew ba ha ka 21 tarik mynta u bnai ka Meghalaya High Court kala pynmih iaka hukum ba la bthah iaka Harijan Panchayat Committee (HPC) ban jubab hapoh shibnai iaka jingtyrwa ka sorkar jylla haba iadei bad ka jingpynkynriah noh iaki 342 tylli ki longïng na Them Iew Mawlong.
U bah Sniawbhalang ula ong ba ka ïng kashari kala ai por iaka HPC ban jubab hapoh shi bnai bad ka sorkar ruh ka kyrmen ba kin jubab halor ka jingtyrwa jaka sah ka sorkar lada pynkynriah noh iaki na Them Iew Mawlong.
“Naka liang ka sorkar kala ai ka Blue Print shaka HPC hynrei haduh mynta kim pat jubab iaka sorkar hynrei hadien ka jingtuklar ka ïng kashari ka sorkar ka kyrmen ba hadien shi bnai ka HPC kan jubab iaka sorkar” la ong u bah Sniawbhalang.
U bah Sniawbhalang ula ong ba naka liang ka sorkar ka kyrmen beit ba ka HPC kan pdiang iaka jingtyrwa ka sorkar namar ka la leh katba lah ban pynbiang iaki jingdawa hadien ba la rai ban pynkynriah iaki na Them Iew Mawlong.
