Shillong, Risaw 25 : Ka kynhun tem Micheal Learns To Rock (MLTR) ba pawnam bha ha ka pyrthei, kala pynthikna ban wan tem ha ka Me’gong Festival ka ban long ha Tura, ha ka 1 tarik u Nohprah 2022.
Kane ka kynhun tem kaba la dep wan ha Nongbah Shillong, kan tem hapoh ka Baljek Airport kum shibynta na ka “BACK ON THE ROAD WORLD WIDE TOUR”. Kane ka kynhun tem kan leit tem ha ki 7 tylli ki Nongbah jong ka Ri India.
Lah ban kdew hangne ba u Myntri Rangbah ka Jylla Conrad K Sangma dang shen, ula pynbna ia kane ka jingwan tem jong kane ka kynhun na Denmark hapoh ka Me’gong Festival.
Ki Nongieid jingrwai jong ka kynhun MLTR ki lah ban khmih lynti ban iohi hi dala ki jong ki khmat ia ka jingtem jong kane ka kynhun ia ki jingrwai ba pawnam ka jong ki kiba kynthup naduh ka “Sleeping Child”, “Paint My Love”, “25 Minits”, That’s Why You Go Away”, Out of The Blue”, “Take Me To Your Heart” bad kiwei kiwei.
Kane ka concert jong ka MLTR kan dei kaba pyllait ei ia baroh ki briew kiba kwah ban leit peitkai bad ban sngap ia ki jingrwai jong kane ka kynhun.
