Shillong, Risaw 25 : Ka Deputy Commissioner ka East Khasi Hills kong Isawanda Laloo, kala maham ia ki Hotel bad ki Restaurant ba kim bit ban pan ia ka bai aijingshakri ne Service Charge lane ban bynrap lang ia ka ha ka bill bam jingbam ne khajna GST na ki riew paidbah.
Kat kum ka jingong jong ka, ka Central Consumer Protection Authority (CCPA) dang shen kala pynmih ia ka kyndon kat kum ka kyndon 18 (2) (1) jong ka Consumer Protection Act, 2019, ban tehlakam ia ki jinglum pisa beain bad ban ai jingiada ia ka hok ki riew paidbah haba phai sha ka jinglum ia ka service charge ha ki Hotel bad ki Restaurant.
Ka Kong Isawanda kala ong ba kat kum kane ka kyndon, ki Hotel ne Restaurant kim dei ban bynrap lang ia ka service charge ha ka bill jong ki jingbam ne khajna GST bad ba kim dei ruh ban pan ia ka service charge ha kiwei kiwei pat ki kyrteng.
Ka ong ba ki Hotel ne Restaurant kim dei ban pynbor ia ki nongwansah ne nongwan bam jingbam ba kin siew ia ka service charge bad ki dei ruh ban pyntip da kaba shai sha kine ki briew baka jingai service charge ka shong ha ka mon jong ki.
Kala ong ba kat kum ka kyndon 17 jong ka Act, ki nongleit sah Hotel ne nongbam Restaurant ki lah ban mudui ia ka jingpynkhein Ain jong ki Hotel ne Restaurant da kaba ai da ka jingthoh lane ki video sha ka Deputy Commissioner ba kan tohkit bad ban phah sha ka CCPA.
Kane ka Khliehduh ka District kala pyntip ba kat kum ka jingbthah jong u Chief Commissioner ka Central Consumer Protection Authority (CCPA) ba 6 tarik Naitung 2022, yn shim ia ki lad jingpynsajia halor ki jingujor pyrshah ia ka jingpynkhein ki Hotel bad Restaurant ia kane ka Ain.
Ia kane la pynmih na ka bynta ka jingtip u paidbah bad ka bha ka miat u paidbah, kala onng haba pyntip ba ia ka copy jong kane ka kyndon la buh ruh hapoh ka Website jong ka District.
