Shillong, Risaw 24 : U Myntri ka Tnad PWD (Building) bad MLA ka Mawhati Bah Dasakhiat Lamare hynne ka sngi nyngkong ula ong ba um sngewpher satia ban ngat shong along namar ka jingiarap ia ki paidbah ka Nongkem Constiuency, kaba u thmu ban iakhun ia ka elekshon MLA-2023.
U Bah Dasakhiat ula kynthoh ia kane halor ka jingujor jong ki katto katne ngut ki briew sha ka Election Commission of India (ECI) ba kynnoh ia u ba ula sam pisa sha kiba bun ki longiing ha ka Nongkrem Constituency haba pynlong ia ka jingialang jong ka NPP ha Nongkrem.
U Myntri ula ong ba ula wan na ka Longiing, kaba lah ban ai jingiarap iano iano ruh kiba donkam ia ki jingiarap haba bynrap “Namar kata, ngam don jingsheptieng wat lada nga shah kem naba iarap ia kum kine ki briew”.
“Wat ki bahaiing jong nga shuwa ba kin rung sha ka kam sain pyrthei, ki ju trei shitom bad u Kpa jong nga dalade u dei tang u nongiah trok hynrei mynta u dei uwei na ki riewsain pyrthei bala rangbah bha ha ka kam hapoh ka Jylla bad namar kata, ka dei ka kamram jong nga ban iarap ia ki briew kiba donkam jingiarap na Nongkrem lane na kino kino ki Constituency jong ka Jylla” ula ong.
Ula ong ba ka iing ka sem jong u ka dei kaba ju iarap khlem por khlem samoi ia ki briew ym tang ha ka por ba long ka elekshon.
Halor ka jingkynnoh ba u thmu iakhun na Nongkrem ba ym don lad shuh ban jop na Mawhati ha u 2023, u Bah Dasakhiat ula ong “Ki briew kiba pynmih ia kine ki jingkynnoh kim pat sngewthuh baka Longiing ki Dhar ki kwah ban rung khlieh ha man ki Constituency ym ban thied ia ki vote hynrei ban pynsaphriang ia ki kam ba bha ki ban ai jingmyntoi ia ki paidbah jong ka Jylla”.
“Ym ym don mano mano ruh ba lah ban khang ia nga ne ka Longiing jong nga ban iarap ia ki paidbah ka Nongkrem lane ki briew na kiwei kiwei ki Constituency namar la pynheh pynsan ia nga ban iarap ia kito kiba donkam hok ia ki jingiarap” ula ong.
