Shillong, Risaw 24 : Ka Hynniewtrep Youth Council (HYC) hynne ka sngi nyngkong, kala dawa ia u Myntri Rangbah Duh ka Ri Narendra Modi bad ia u Myntri Kam Pohiing Amit Shah ban wanrah ia ka jingtyrwa ba ka Sorkar Pdeng ka kloi ban ai ILP lada ka Jylla ka jied ia ka BJP ban synshar ia ka Jylla Meghalaya.
Kane kala mih kum ka jingkynthoh iaka jingkren ba dang shen jong u Myntri ka Ministry of Law & justice Kiren Rijiju ba ong ba ka Jylla ka donkam ia bun ngut ki MLA na ka BJP ban tynruh ia ki ishu kiba ktah ia u paidbah ka Jylla haba jubab ia ka jingkylli halor ka jingpynslem ka Sorkar Pdeng ban pyntreikam iaka ILP ha Jylla;
Haba iakren bad ki nongthoh khubor, u General Secretary ka HYC samla Roykupar Synrem ula ong “Lada la BJP ka pyrkhat ba khnang ban ngin ioh ia ka ILP, ki paidbah ka Jylla ki dei ban jied bun ia ki MLA ia ka BJP, ngi kyntu ia u Myntri Rangbah Duh bad ia u Myntri kam Pohiing ba kim wanrah ia ka kynja jingtyrwa hakhmat ki paidbah ka Meghalaya bad ai ba ki paidbah ka Jylla kin rai la ka dei ne em ban ailad ia ka BJP kan ialam ia ka Jylla”.
