Shillong Risaw 22: U Myntri Rangbahduh ka ri, u Narendra Modi hynne ka sngi ula plie ia ka Rozgar Mela ne ka jingpynrung kam ia ki 10 lak ki briew lyngba ka Video Conferencing bad ia kane ka jingialang ha jylla Meghalaya la pynlong hapoh Madan Polo, Shillong ia kaba la wan ban iashimbynta da u Myntri Sorkar uba khmih iaka tnad Aiñ u Kiren Rijiju.
Ha kane ka jingialang, la aiti ia ki shithi pynskhem kam sha palat 75,000 ngut ki briew ba dang shu ioh kam thymmai.
“Kane ka dei ka sngi jong ka jingiasoh kaba thymmai lyngba ka Rozgar Mela kaba la pyniasoh bad ki kam kiba iadei bad ka jingthung kam bad ki jingseng kam lajong ha ka ri kiba la iaid la 8 snem mynta,” ong u Myntri Rangbah Duh ka ri u Narendra Modi lyngba ka Video Conferencing.
U la ong, da kaba kynmaw ia ka jingdap 75 snem ka jingioh jinglaitluid, ka Sorkar Pdeng ka la ai ia ki shithi pynskhem kam ia ki 75,000 ngut ki samla hapoh kane ka prokram bad la rai ruh ba ka jingai ia ki shithi pynskhem kam , ka dei ban sdang khnang ban pyndep ia ki projek ha ka por kaba la buh ha baroh ki tnat bad ha ki sngi ban wan ruh, ki briew kin sa ioh ia ki shithi pynskhem kam jongki na ka Sorkar.
Katba u Kiren Rijiju haba ai jinkren ha ka prokram Rozgar Mela ha Madan Polo, ula ong, “Nga ai khublei ia phi iwei pa iwei kiba dang shu ioh kam kiba iadonlang hangne ban pdiang ia ki shithi pynskhem kam jong phi. Ha u 2047, ngin sa rakhe ia ka jingdap 100 snem ka jingioh jinglaitluid ka ri bad kito kiba shah pynrung kam mynta ka sngi bad kiba hadien ruh kin don ka bynta kaba khraw ha kaban nohsynniang ban poi sha ka thong kumba angnud da u Myntri Rangbah duh ban pynlong ia ka ri India ka ri kaba la kiew”.
U Rijiju ula pyntip ba ula iatreilang bad u Myntri Rangbahduh ka ri la slem bha bad ka rukom synshar kala kylla, ka rukom treikam kumjuh ruh ka jingphaikhmat kyrpang na ka bynta ki jaka nongkyndong bad ki thain khappud kila kylla ha ki 8 snem ba la leit.
“U Myntri Rangbahduh u la pynlong ia ka thain Shatei Lam Mihngi kaba kongsan. Ngi lah ban iohi ia ka jingkylla ha ka thain Shatei Lam Mihngi, kata na ka thain kaba suki bha ha ka roi ka par, mynta ka la long ka thain kaba kiew sted haka ioh ka kot,” ong u Rijiju.
“Ka Shillong ka ju long ka nongbah jong ka thain shatei lam mihngi, namar ki sahep Bilat kila seng iaka kum ka nongbah, ka don ia ki jingdonkam kiba katkum ka juk naduh ka por kaba sdang. Hynrei lada phi mih shabar kane ka nongbah bad leit sha kiwei kiwei ki jaka phin iohi ia ki jingkylla ba la wanrah da u Myntri Rangbahduh,” ong shuh shuh u Rijiju.
“Nga dei na kane ka thain kumta nga don ka jingiadei kaba jan namar nga la leit kylleng ka thain. Ka thain Shatei Lam Mihngi baroh kawei, ka dang kiew stet. Ngi la long ka jaka pdeng jong ka ioh ka kot bad ka thain kala long kaba seisoh. Ka don baroh ki jingdon jingem ka mariang, ka don baroh ki jingthung bad ki mrad ba itynnad. Ki briew jong ka thain ki long kiba riewspah ha ka kolshor,” la ong u Myntri.
Ha katei ka jingialang la wan ban iadonlang ki heh ophisar jong ka sorkar pdeng bad sorkar jylla ki kynrem ki lyndan bad kiwei kiwei.
