Shillong, Risaw 19: Ka North Eastern Hill University Students Union (NEHUSU) ryngkat ka Khasi Students Union (KSU) hynne ka sngi Balang kila kyntu ia u Myntri Rangbah ka Jylla Conrad K Sangma halor ka jingkynnoh ba pyrshang pynman bakla (misinterpret) ia ka NEHU Ordinance da kaba thmu ban ai tam tang 10 mark ha ka jaka 10% ia ki samla pule kiba kwah ban rung klas hapoh kane ka skulbah.
Ha ka shithi sha u Conrad, kine ki artylli ki seng ki samla pule kila ong ba kat kum ka rukom pynrung klas hapoh NEHU, kala don ka jingiatakhuh hapdeng ka jingpynman ia ka rukom pyngshong nongrim ia ka bhah (weightage) ba dei ban ai sha ki samla pule ba kwah ban ioh pule hapoh ka University.
Kila pynpaw ruh ia ka jingpyrshang kaba jur halor ka jingthmu ban pynman bakla ia ka NEHU Ordinance da kaba ong ba kane kan sa ktah jur ia ki samla pule na ka Jylla bad ki College kiba iasoh bad ka NEHU kiba kwah ban wan pule ha kane ka skul bah.
Kat kum ka jingong jong ki, ki pyrshang jur ruh ia kano kano ka jingpynkylla thymmai lada don jingmut ha ka Academic Council, kaban sa iakynduh ha ka 20 tarik u Risaw.
Ka shithi ka ong “Ngi kyrpad ia ka Ophis jong phi ban sngewbha tuklar ia kane ka kam bad ba ki bor pyniaid jongka NEHI kim dei ban wanrha ia ki jingpynkylla ne pynman bakla ia ka Ordinance. Ka nongrim jong ka bhah ba dei ban ai sha ki samla pule ba kwah rung klas ka dei ban long da kaba shu bynrap da ka percentage kat kum ka Ordinance ym da ki mark. Ka jingtuklar jong phi ia kane ka kam kaba kyrkieh bad ba kongsan eh kan dei kaba ai jingiaroh da ki samla pule baroh lang”.
Ka NEHUSU bad ka KSU kila ong ba kat kum ka clause 5 of RC-1 jong ka ordinance OC-1 ka North Eastern Hill University, “Ka nongrim ban pynrung klas bala ai sha ki Graduates na ki college ba iasoh bad NEHU bad ki Graduates kiba dei na kiwei pat ki Universities lait na ka NEHU hynrei kiba dei ki nongshongshong ka Meghalaya kan long 10%”.
Haba pynpaw ba ka bhah ba 10% ka dei ban bynrai lang sha ka jingioh mark ha ka CUET kat kum ka ordinance, kine ki seng kila ong, kala don ka jingpyrshang ban pynman bakla ia ka rules da kaba thmu ban pynshong nongrim ia ka bhah tang da kaba ai 10 mark ha ka jaka jong ka 10% kat kum ka Ordinance.
