Shillong, Naiwieng 20: Ka Shillong Lajong FC ka la hap ban iaksaid tyngeh ban lah pynliem ia ka Mawkhar Sc da 3-2 kol, ha ka jingiakhun ka lympung ialehkai SSA Champions Cup, ka jingiakhun kaba dei jong ka Group-B, kaba long hynne ka nohphai sngi, ha SSA Stadium, Polo.
Ka dawbah kaba pynlong ia ka Lajong ba kan hap ba kan ksaid tyngeh ka ong ba khlem poi pyrkhat ba ka kynhun ialehkai ka Mawkhar SC, ka la lah ba kan tam shakhmat da ki ar kol, kiba la ioh ban thep ia ki da u Mackiven Shyrkon (16’) bad Donbok Sohtun (25’), ba la ioh ban thep ia ki tang hapoh shi kynta ba la sdang kane ka jingiakhun.

Hadien ba la shah tam shakhmat, ka Lajong, shipor ka la sdang ban klumar jingmut, hynrei ban sdang ban tehlakam ia ka jingiakhun tad haduh ba kan da beh kylla nadien ban ioh pat ban thep ia ki lai tylli ki kol ki jong ka, lyngba u Wilbert Marbaniang (34’), Emanbha Marbaniang (45’) bad Badondor Marbaniang (68′).
Da kane ka jingjop, ka Lajong ka la ioh ba kan khur pura 9 point na ki lai sien iakhun ba ka la dep bad ba kan lah syndon ban pyntikna ialade ba kan buh jaka sha ka semifinal jong kane ka lympung.

Haba phai pat sha ka kynhun ialehkai ka Mawkhar, ka namrem, ka pynlong ia ka ba kan iai neh ha ka 6 point hadien ki saw sien iakhun ba ka la dep bad ba kan don ha ka kyrdan kaba ar ka miej iakhein point na kane ka group bad kaba dei artad ka jingiakhun ba khatduh ka jong ka ha ka round-robin.
Katba kiwei pat ki kynhun ba don lang ha kane ka group ba kynthup ia ka Sanmer SC, Sohryngkham SC bad Sei La Sap FCC , ki la ioh ba kin ia khur kar lai point bad sah ruh sa ha kti sa mar kawei ka jingiakhun ki jong ki.
Haba phai biang sha kane ka jingiakhun, ka Mawkhar SC ka rung sha kane ka jingiakhun hadien ba ka la lah shwa ba kan thep tang lai tylli ki kol, kaba hynne pat ka sngi, shipor ka la sei ia ka khubor kaba lam pongpet tad haduh ba kan da lah ban tam kylla shipor shakhmat da ki ar kol ia ka Lajong.
Ka jinglah ban ioh thep kham kloi ia kine ki ar kol ka la ai mynsiem bha ia ki rang ialehkai jong ka Mawkhar SC bad ba la nang ai mynsiem pat ia ki da ki kato katne ki nongwan kyrshan ki jong ka.
Haba la shem ia kum kane ka sur ialehkai ka Mawkhar, ka kynhun ka Lajong ruh, ki la hap ban kyntiew kham bha ia la ka rukom ialehkai ka jong ki, kaba shipor, hadien ba ki la shah tam shakhmat, katta ka sur ialehkai kane ka kynhun, ka la I klumar bha, ha kaba kim lah shuh ban ia mir ne ban iarap ban ia pynbuh bok hapdeng para maki, katno tam lei lei haba ki rang ka Mawkhar SC, ki la shu iakhun tyngeh beit naduh ka mynsiem.
Dei tad haba la wan ban bteng ia ka kylla miet, ba u sawar ka nam ialehkai ba kham bha ba la sdang ban kham noh sha ka Lajong, kaba da iakhun tyngeh katba lah ban wanphai beit bad ka jingjop napdeng ka madan iakhun.
Lashai pat ka sngi kin don haduh artylli ki jingiakhun kiban sdang ha ka juh beit ka por, katta ha ka por 2:30 nohphai sngi, ha kaba ka jingiakhun jong ka Gr-A kan long hapdeng ka Mawpdang SC pyrshah ia ka Lamlynti FC ha SSA Stadium, Polo, bad ka jingiakhun jong ka Gr-B la buh ban pynlong ha madan jong ka MFA Turf Third Ground, Polo ban iakhun hapdeng ka Sanmer SC pyrshah ia ka Sei La Sap.

