Shillong, Naiwieng 20: Ka Hynñiewtrep Youths’ Council (HYC) kala pynrem jur ia u Myntri Rangbah ka Jylla Conrad K. Sangma halor ka jingkam ba katto katne ki nonghikai deficit ha ki college ka Meghalaya ki ioh ia ka tulop kaba T.4.5 lak shi bnai bad kila kob ia u Myntri Rangbah ba udei ban sei da ki kot ki sla ne ban weng noh ia katei ka jingkren ka jongu nalor ban pan map.
Ha ka kyrwoh kaba la pynmih ha ka sngi thohdieng, u President ka HYC u bah Roy Kupar Synrem ula ong ba kum katei ka jingkren na u khlieh ka jylla kadei ban don ia ka jingkyrshan da ki sabut, ym ban shu pynheh ia ka jingkhein ban pynjah burom ia ki nonghikai.
“Ka HYC ka pynrem jur ia ka jingkren u Myntri Rangbah kaba ula kam ba katto katne ki nonghikai deficit ha ki college ka Meghalaya ki ioh ia ka tulop kaba T.4.5 lak shi bnai” ong u Bah Synrem.
“Kum katei ka jingkren na u khlieh ka sorkar jylla kadei ban don ia ka jingkyrshan lyngba ki kot ki sla ym da kaba shu pynheh ia ka jingkheiñ da ka jingthmu ban pynjah burom ia ki nonghikai,” ula bynrap.
Da kaba pynpaw ba ka 7th UGC Pay Structure, ka HYC kala ong ba ka entry-level basic pay ka sdang kumba T.57,700 ia ki Assistant Professor sha ka T.1,44,200 ia ki Professor bad T.1,82,200 ia ki Senior Professor.
“Wat ha ka thup jong ka jingsiew ne ka pay-matrix cell hapoh ka Academic Level 15 kadei T.2,24,100. Katba ka allowances increase gross salaries, u Myntri Rangbah ula kam ba ka long T.4.5 lak ka dawa ba dei ban pyni da ki jingthoh kaban kyrshan ia ka jingkam,” ong u Bah Synrem.
Ka HYC kala kob ia u Myntri Rangbah ban sei tang ia kawei ka pay slip kaba shisha.
“Ka HYC ka kob ia u Myntri Rangbah ban sei tang ia kawei ka pay slip kaba shisha jong ki nonghikai college deficit kiba ioh T.4.5 lak shi bnai. Ai ba un pynbna ia ka kyrdan hikai, ia ka kyrdan jong ka jingnang jingstad bad ki bynta jong ka tulop” ong u Synrem.
“Lada ym lah ban pynbiang ia ki sabut, udei ban weng noh ia katei ka jingkren bad ban pan map na ki nonghikai” ula ong.
Ka HYC kala kylli ia u Myntri Rangbah ban pynbna katno lah pynlut ia ka pisa paitbah ha ka jingthung ia ki Political Appointee kum ki Chairperson, Co-Chairperson bad ki Adviser.
“Ka long kaba kongsan lang ba u Myntri Rangbah un batai ia ka jingpynlut ia ka pisa paitbah ha kaba iadei bad ki briew kiba don ha ka kam sain pyrthei kum ki Chairperson, Co-Chairperson bad Adviser. U Myntri Rangbah udei ruh ban pynbna ia ka jingpynlut baroh ha ka jingsiew tulop, allowances, kali, ki nongtrei bad kiwei kiwei ki jingioh jingmyntoi” ong u Synrem.
“Balei ki nonghikai kin mad ia ka jingshah bishar bniah hakhmat jong ki paitbah katba ia ka tulop, allowances bad ka jingioh jingmyntoi ki political appointee kadei ka bym shim la don satia kano kano ka jingai jingbatai?” ula kylli.
Ka HYC kala ong kan ym shah ba ki nonghikai kin kylla langknia.
“Ka HYC kan ym shah ba ki nonghikai kin shah pynkylla langknia lyngba ka jingkynnoh ka bym don satia ia ka jingkyrshan kaba biang,” ong u Synrem.
“Sangeh ka ialam bakla ia ki paitbah, ko Myntri Rangbah pyni ia ki sabut ne shu pan map noh” ula bynrap.

