-->

Aiti ka Sorkar Jylla ia ka Baljek Airport sha ka AAI | Plie lynti ia ka jingdon ki liengsuin na Tura

Date:

Share post:

Shillong, Naiwieng 19 : Ka Sorkar Jylla bad ka Airport Authority of India (AAI) ha ka sngi Palei, kila iasoi ia ka Memorandum of Understanding, na ka bynta ka jingaiti bad jingshimti ia ka Baljek Airport, Tura, kaba pyni dak ia ka sienjam ban sdang pyntreikam noh ia kane ka kadliengsuin bad pynkhlain ia ki lad pyniasoh na suin ha ri-lum Garo.

Ia kane ka soskular la iasoi ha ka jingiadonlang u Myntri Rangbah Conrad K Sangma, u Symbud Myntri Rangbah ba khmih ia ka Transport Bah Sniawbhalang Dhar bad ka Dkhot (HR) ka AAI Nivedita Dubey.

“Ia ka MoU la iasoi hapdeng ka Sorkar Meghalaya bad ka Airport Authority of India (AAI) na ka bynta ka jingaiti bad shimti noh ia ka Baljek Airport, Tura. “Kane ka long ka sienjam kaba kongsan ban pynkloi ïa ka jingpynbiang ïa ki jingdonkam jong ka Airport ban lah pynïaid ïa ki liengsuiñ kiba treikam ha ki bynta jong ka thaiñ, bad ban kyntiew kyrdan ha ki por ban wan na ka bynta ki liengsuiñ kiba kham heh hapoh ka RCS-UDAN 6.0 Scheme,” ong u Sangma ha X.
“Kane kan kyrshan ïa ki jingpyrshang jong ngi ban kyntiew ïa ka jingpynïasoh ha ka thaiñ, bad ban plie shibun ki lad ha ka kam jngohkai pyrthei, ka khaii pateng bad ka roi ka par jong ka ioh ka kot ha ri-lum,” u la bynrap.

Hapoh kane ka soskular, ka Airports Authority of India kan shimti ïa ka jingkitkhlieh ban pynïaid, ban synshar kam, ban sumar bad ban pynroi shuh shuh ïa ka Baljek Airport ha ki por ban wan.

Kum shibynta jong ka jingpynroi ha ka Phase-I, ka AAI kan pynbha ïa ka airport khnang ban lah pynïaid ïa ki liengsuiñ kiba 19 seat, hapoh ka Modified RCS-UDAN Scheme. Ka jinglut jingsep ha kane ka jingpynroi kan ioh ia ka jingkyrshan lyngba kane ka scheme da ka rukom ban siew pat hadien ïa ka pisa (reimbursement), bad kan ym don kano kano ka jingkitkhlieh ban hap shim da ka Sorkar Jylla na ka bynta ki kam pynroi ia ka airport ha ka Phase-I. Ka Sorkar India la khmih lynti ba kan mang kumba Rs 100 klur na ka bynta ka jingpynroi ïa kane ka airport hapoh kane ka scheme.

Hadien ba la pyndep ïa ki kam pynroi bad sdang ïa ka jingpynïaid liengsuiñ, ka Baljek Airport kan lah ban shah kynthup hapoh ka RCS-UDAN route bidding process. Kane kan pynïasoh lyngba ka liengsuiñ ïa ka Tura bad ki jaka ba kongsan kum Shillong, Guwahati, Kolkata bad kiwei pat ki nongbah ha ka thaiñ Shatei Lam Mihngi.

Ha kajuh ka por, ka Airports Authority of India kan pynkhreh ïa ka master plan na ka bynta ka jingpynroi kaba bun snem ïa ka airport, khnang ban lah pynïaid ïa ki liengsuiñ kiba hapoh ka kyrdan ATR-72 bad A-320. Ki kam pynheh bad pynbha kiba donkam na ka bynta kum kine ki liengsuiñ, yn sa pyntreikam da ka AAI na la ka jong ka pisa.

Hadien ba la pyndep ïa ki kam pynroi, ka bor pynïaid kan shimti pura ïa ka jingpynïaid ïa ka airport, kynthup ïa ki kam pynïaid liengsuiñ, ki jingïakren halor ki air traffic, jingïalam lynti, jingïoh jingtip bad jingpeitngor, ki kam pynïaid ïa ki liengsuiñ, bad kan bah ïa baroh ki jinglut jingsep kiba wan hadien na ka bynta ki jingtei bad ki kam pynïaid jong ka airport.

Ka Sorkar Meghalaya kan ai ïa baroh ki jingkyrshan kiba donkam, kynthup ïa ka jingpynbiang jaka, ki jingtei kiba shabar jong ka airport, ki jingbit kiba donkam katkum ka aiñ bad ki jingpynbeit halor ka jingshngaiñ, khnang ban pynsuk ïa ka jingpyntreikam ha ka por kaba biang bad ka jingpynheh ïa ka airport ha ki por ban wan.

Share post:

-->
spot_img

Popular

More like this
Related

“Khlem leh politics, hynrei dawa iala ka hok” : Synniang ki nonghikai deficit mar T.1 sha u DyCM

Rai ban pynbteng beit ia ka jingsangeh treikam Shillong, Naiwieng...

Lah kut ka jinghap ieng lain ha ki Ophis DTO | Haduh 42 ki Transport Services lah leh online

Shillong, Naiwieng 19 : Kiba kwah ban pynthymmai iaki...

Yn siew ka sorkar ia ka arrear DA | Ka CPF ka dang don ha Iingkashari: ong u DyCM ia ki nonghikai deficit

Shillong, Naiwieng 19: U Symbud Myntri Rangbah ka Jylla...