Shillong, Naiwieng 17: Ka Election Commission of India (ECI) ka la pynbna ia ka por jong ka Special Summary Revision (SSR) jong ka Electoral Roll ha Meghalaya, ha kaba ia ka thup kyrteng thep vote ba khatduh yn sa pynmih ha ka 20 tarik Kyllalyngkot 2027.
Ka jingpynkylla, kaba la buh tarik kan dei 1 tarik Kyllalyngkot 2027 ban pynthikna ba baroh ki nongshong shnong kiba dei hok, khamtam ki samla bad ki nongthep vote ba nyngkong eh, kin shah pynrung ha ka thup kyrteng nongthep vote.
Katkum ka jingpyntip ka Ophis Chief Electoral Officer, ia ka integrated draft electoral roll yn sa pynmih paidbah ha ka 1 tarik Nohprah 2026 bad ki nongshong shnong ki lah ban ujor ïa naduh ka 1 tarik haduh ka 31 tarik Nohprah 2026.

Ka jingpynbeit ia ki jingujor yn pyndep ha ka 14 tarik Kyllalyngkot 2027, shwa ban pynmih khatduh ia ki thup kyrteng nongthep vote ha ka 20 tarik Kyllalyngkot 2027.
Ka ECI ka la kyntu ïa ki nongshong shnong kiba dei hok kiba la dap ne kin sa dap 18 snem ka rta ha lane shwa ka 1 tarik Kyllalyngkot 2027, ba kin apply ban pynrung kyrteng lada ym don kyrteng ha ka thup kyrteng nongthep vote.
Ki nongthep vote ki ban sa ban dap 18 snem ha ka 1 tarik Iaiong, 1 tarik Naitung ne 1 tarik u Risaw 2027, ki lah ruh ban aiti lypa ïa ki aplikeshon ban pynrung kyrteng.
Ia ki aplikeshon ban pynrung kyrteng lah ban ai lyngba ka Form 6, katba ka Form 6A ka dei na ka bynta ki nongthep vote ba sah sha bar ri.

Lah ban pyndonkam ia ka Form 7 ban pynpaw ia ki jingpyrshah ia ka jingthmu ban pynrung ne pyndam ia ki kyrteng, bad ia ka Form 8 na ka bynta ban pynkylla ia ka jaka sah, ban pynbeit ia ki jingtip ba kyrpang, ban bujli ia ka EPIC bad ban shah kynthup kum ki briew kiba don jingduna ha ki dkhot met.
Ia ki aplikeshon lah ban thep online lyngba ka Voters’ Services Portal, ka ECINET mobile app lane offline lyngba ki ophisar ba dei peit ia ki nongthep vote, ki Assistant Electoral Registration Officers and Booth Level Officers.
Ka Election Commission ka la bthah ruh ban pynbeit ryntih bad pynbeit thymmai ia ki jaka thep vote hapoh ka 23 tarik Naiwieng, kane ka jingleh kan kynthup ia ka jingpynshisha ia ki jaka thep vote bad ka jingpeit bniah ban pynsuk jong ki.
Ka Commission ka la buh kyndon ba ki jaka thep vote ha ka rukom kaba thikna kim dei ban don palat ia ka 1,200 ngut ki nongthep vote bad ba ki nongthep vote kim dei ban iaid palat ia ka 2 km ban poi sha ki jaka thep vote.
Yn pynlong ia ki jingpynrung kyrteng kyrpang bad ki jaka ai jingiarap ban pynsuk ia ka jingpynrung kyrteng ia ki nongthep vote kiba dei hok, da kaba pyrkhat kyrpang ia ki nongthep vote kiba dang samla, ki kynthei, ki tymmen, ki briew kiba don jingduna ha ki dkhot met, ki briew ki bym don iing don sem bad ki nongbylla sngi.

U Chief Electoral Officer u la kyrpad ïa ki nongshong shnong ba kin pynshisha ïa ki kyrteng bad ki jingtip jong ki ynda la pynmih ïa ki draft electoral roll bad ban aiti ïa ki jingujor ne jingpyrshah hapoh ka por ba la buh.
Ia kane ka revision exercise yn pynlong da ka jingiasyllok bad ki seng sain pyrthei kiba la ithuh, ha kaba yn pynshlur ruh ban thung ia ki Booth Level Agent ban iarap ban ithuh ia ki nongthep vote kiba dei hok kiba khlem pat pynrung kyrteng.

