Shillong, Nov 17: U Myntri Rangbah ka Jylla Conrad K Sangma ha ka sngi Baar ula ong ba ka jylla ka thmu ban buh ialade ha ka kyrdan kum ka Jylla AI ne ka AI Valley kaban wan jong ka ri India ha kaba yn sdang shwa ia ka jingaikam ia ki 125 ngut ha ka liang jong ka Artificial Intelligence kaba long ka sienjam jongka jingsdang ban thaw ia ka lad aikam lyngba ka jingpyndonkam ia ki kor teknoloji na ka bynta ki samla ka jylla.
Haba kren ha ka jingialang plie ia ka AI Job Fair ryngkat bad ka Shamrock AI, u Conrad Sangma ula ong ba katei kadei shi bynta jong ka jingiohi jngai kaba ula shimkhia naduh u snem 2008 ban pynkylla ia ka Shillong bad Meghalaya sha ka shlem IT.

Ula ong, ba ka jylla ha kine ki snem kala trei shitom ban tei ia ki jingtei, ban saindur ia ka sap ki samla bad ban tei ia ka jingiadei bad ki nongialam jong ki karkhana ban tei ia ka jinglong jingman kaba biang ha ka liang ka teknoloji.
“Mynta, haba peit ia ka jingsdang ia ka jingiohi jngai ba kan wandur ka long kaei kaei kaba sngewkmen bha” ula ong.
U Myntri Rangbah ula ong, ba ka jingthmu ka sorkar ka long ban pynlong ia ka Meghalaya kaba lamkhmat kum ka jaka ka AI ha ka ri, kaban khring ia ki kompani teknoloji kiba heh bad ban thaw ia ki lad aikam aijam na ka bynta ki samla kiba napoh ka jylla bad ia ka thain̈ baroh kawei.

Ula pynpaw ba ki 125 tylli ki kam ha ka liang ka AI kadei tang ka jingsdang bad pynpaw ia ka jingskhem jingmut ba ka jingiatreilang bad ki karkhana kiba khlain bad ka jingroi ki sap ki phong kan iarap ha kaban pynmih shuh shuh ia ki lad iohkam.
U Sangma ula ai khublei ia ka Shamrock AI, Prolifics, ki karkhana kiba iatreilang, ki jaka pule bad ka tnad IT ka jylla halor ka kamram kaba kila leh ban pynlong ia kane ka sienjam.
Ula ong ba ka sorkar ka kut jingmut ban tei ia ka sawdong sawkun kaba iadei bad ka teknoloji ban pynlong ia ka Meghalaya ka jaka kaba khring ia ki nongkynshew tyngka bad ka jingleh ia ki kam kiba long thymmai.

