Tura, Naiwieng 13 : U Lat ka Jylla Chandrashekar H Vijayashankar ha ka sngi Thohdieng ula pynbna ia ka grant ba T.5 lak sha ka Hundred Drums Wangala Festival Committee na ka bynta ban pynneh pynsah ia ka riti dustur bad ka pateng tynrai ki paid Garo, ha ka jingiashimbynta ka sngi ba lai jong ka jingrakhe Golden Jubilee jong ka 1000 drums Wangala Festival ha Tura.
Ia kane ka jingrakhe ba 50 snem jong ka tamasa la sakhi da ki jingleh niam nala tynrai, ki jingshad nala tynrai bad ka dur jong ka jingiatied ia ki 1000 tylli ki ksing, kaba pyni ia kawei pat ka sngi jong ka jingrakhe ha West Garo Hills.
Haba niew ia ka ri-lum Garo kum ka jaka ki riewshlur bad riewialeh, u Lat u la ai jingïaroh ïa ka bynta jong ki nongïalam kiba la lamkhmat ha ka por mynshwa ha kane ka thaiñ, kiba la noh synñiang sha ka roi ka par jong ka Jylla Meghalaya. U la ong ba kane ka jingïarap pisa kan kyrshan ïa ki jingpyrshang ban pynneh pynsah ïa ki riti dustur bad ka pateng tynrai jong ka jaitbynriew.
U Lamphang ka Ïingdorbar Thawaiñ ka Jylla Meghalaya, Thomas A. Sangma, uba la donlang ha kane ka prokram kum u symbud kongsan, u la kren halor ka jingïaid lynti jong kane ka tamasa ha kine ki sanphew snem. U la pynkynmaw ba kane ka jingrakhe, kaba la sdang tang da ki shiphew tylli ki ksiang, mynta ka la nangroi sha kawei na ki prokram pyni kolshor kaba heh, kaba la kynthup haduh hajar tylli ki ksing.
Ka prokram ka la sdang da ka jingduwai kyrpang kaba la lamkhmat da u Rev. Donaldwood R. Marak, bud sa ka jingsam ïa ki momento sha ki kynrem ki lyndan kiba la don bynta ha kane ka prokram. Ka Saka Choir ka la ai ia ka jingrwai jong ka Wangala, kaba kyrteng “Dimdim Dimchong Dachichong”.
Ki prokram pyni kolshor ki la poi sha ka bynta kaba shongshit tam lyngba ka jingshad bad jingsawa jong ki hajar tylli ki ksing, kaba la tip kum ka Rhythm of Thousand Drums. Hadien kane la pynlong ïa ka jingthang ia ka Chachat So•a, ha kaba u Lamphang ka Ïingdorbar Thawaiñ ruh u la ïashim bynta.
Ha kane ka prokram la don ruh ka jingrwai tynrai kaba la rwai da ka Bolabeta Cultural Artists Society na Ranikor, bad ka jingshad jong ka Kids Wangala Troupe.
Kiba la donlang ha kane ka prokram ki kynthup ïa u Myntri Excise Brening A. Sangma; u Deputy Commissioner ka West Garo Hills Vibhor Agarwal; bad u Chairman ka Hundred Drums Wangala Festival Committee Ronald Rikman Sangma.
