Williamnagar, Naiwieng 13 : Ki Pulit ka East Garo Hills kila pynlong ia ka jingtohkit halor ka jingkynnoh byrngem byrsit pyr shah ia u nongleh vlogger ha ka thain Mangsang jong ka District, hadien ka jingmih ki video ha ki social media.
Ha ka kyrwoh bala pynmih ha ka sngi Thohdieng, ki Pulit ki iathuh ba kila shim case suomotu halor kane ka jingkynnoh byrngem pyrshah ia u nongleh vlogger bala tip ha ki social media handle da u @ABfamily2024.
Ki Pulit kila sdang ia ka jingtohkit ban pynthikna ia ki daw ha lyndet jong kane ka jingjia, ban ithuh ia kito kiba donkti bad ban ai jingpynshitom kat kum ki kyndon jong ka Ain.
Ki Pulit ki iathuh ba kila shimkhia bha ia kane ka jingjia bad ban biang ia ka jingkut jingmut ha kaban pynthikna ia ka jing shngain bad ka jingai jingiada ia baroh ki nongshongshnong.
Kila kyntu ruh ia ki paidbah ba kin iatreilang ha kane ka jingtohkit bad ban kiar na ka jingpynsaphriang ia ki khubor hamsaia lane iakren iakhana ba shu antad kaba lah ban ktah ia ka jingtohkit.
Ki Pulit kim pat shym la batai bniah halor kane ka jingjia lane ka jingithuh ia ki briew kiba donkti.
