Shillong, Naiwieng 12: Ha ki ar tylli ki jingialehkai ba itynnad jong ka Group B ka SSA Champions Cup 2026, ka Sei La Sap FCC bad ka Mawkhar SC ki la lah ban ioh ia ka jingjop ka ban ai mynsiem iaki ban iakhun ha ka ban poi sha ka semifinal jong ka lympung.
Ka Sei La Sap (ba wan ba ar ha ka Fourth Division mynta u snem) ka la wan phai naka jingshah thep nyngkong ban pynliem noh ïa ka Sohryngkham (ba wan ba ar ha ka kyrdan ba ar) da 4-2.
Nangta, ka Mawkhar SC (ba jop iaka First Division) ka la pynliem ïa ka Sanmer SC (ba jop iaka Third Division) da 2-1.
Kumba long ha kiwei pat ki jaka ha nongbah Shillong, ka madan Polo ka la shah ktah jur ha u phria bad kata ka la pynslem ïa ka jingsdang jong ka jingïalehkai kaba nyngkong da shiteng kynta.
Ka Sohryngkham kam shym la duh mynsiem kala wanphai shaka jingialehkai da kaba thep kol nyngkong lyngba u Damanglangki Makdoh (2’).
Ka jingpynïakhaid ka la wan tang ha ka bynta ba sdang jong ka kylla miet haba u Kennyson Khyriem (49’) u la rung shapoh ka Penalty Box ban ioh thep ban pyniakhaid.
Ka Sei La Sap, kaba ïalehkai ha ka jingïakhun ba nyngkong jong ka, nangta ka la ioh kabu hadien baka bol ka poi ha h Freestar Kharbangar uba la mareh bad ula jan ioh ban pyntam goal ha ka minit kaba 75.
Ka jingtam goal kala kut noh hadien ba u Bankynshew Warjri (79’) u la lah ban pynkhih iaka jar daka ba shut iaka bol najrong shaka diang na u nongapkol ka Sei La Sap u Aiboklang Jyrwa.
Ki dang sah sa ar tylli ki kol ha kane ka jingïakhun bad baroh arngut ki la hap na ka bynta ka Sei La Sap, u Eddiesius Kharkongor (85’) u la thep nyngkong naka liang kadiang jong u nongap kol ka Sohryngkham, u Klibarson Lawai shwa ba u Melbertson Kharbangar (90’+6) un ioh thep ua ka kol kaba saw.
Ka la long ka jingjop kaba pynduh jingkyrmen ia ka Sohryngkham, kaba la sdang ia ka Champions Cup da kaba jop ia ka Mawkhar ha ka taiew ba la dep.
Ka Mawkhar ka la iakhun ha ka jingialehkai kaba ar bad kala wanphai naka jingshah thep nyngkong ban khur 3 point pyrshah ia ka Sanmer.
Na ka bynta ka Mawkhar ki la thep da u Vobisterfield Marngar (35’) bad u Mackiven Shyrkon (69’) shwa ba ka Sanmer kan bat ia ka shyntur jong ka ha ka jingialehkai da ka jingai khublei ia u Isharwer Mukhim (71’).
Ki jingïakhun ban wan ha ka Champions Cup kin long ha ka sngi Saitjaiñ ha ka por 11 baje mynstep ka Lajong kan ïakhun pyrshah ïa ka Sei La Sap ha ka Group B bud sa ka Mawlai SC kan ïakhun pyrshah ïa ka Mawpdang SC ha ka por 2:30pm ha ka Group A.
