Nongstoin, Naiwieng 11 : U phria uba neh haduh shikynta tam, ula pynjulor haduh 90 % ki pynthor kba kiba don ha ka thain Ri-Muliang, West Khasi Hills.
Kane ka jinglynshop u phria kala jia ha ka janmiet sngi Ba-ar, uba la wan ryngkat u lapbah hapdeng ka por 12 baje mynsngi haduh 1 baje nohphai sngi.
La iathuh ba ki pynthor kba kila julor laki laka bad la shem ba ki sohkba kila hap lut sha mdan bad shah kit ha ka um kaba tuid lyngba ki pynthor.
U Sordar ka Shnong Mawkapiah, Bah Bitstarwel Kharbani, u la iathuh ba ki shnong kiba la shah ktah palat ha kane ka jingjia ki dei ki lai shnong-ka Kyndongngei, Mawkapiah bad Nongrimhill, ha kaba ka jingjulor ka la long kumba 90 percent ei ei.
Nalor kata kiwei kiwei ruh ki shnong ba marjan jong katei ka thain kiba rep kba ha ka pynthor kaba la tip kum ka Nongstong, ki la shah ktah jur ha kane ka jingjia ther phria.
U Bah Bitstarwel Kharbani u la ong ba hynne ka sngi 11 tarik Naiwieng 2026, ma u ryngkat bad ki riew rangbah ki la leit ban ai jingtip ia kane ka jingjia ha u BDO jong ka Ri Muliang C&RD Block.
U la ong ba ki paidbah nongshong shnong khamtam ki nongrep ki la diaw mynsiem bha namar ka jingtrei shitom baroh shi snem la pynjot noh tang ha ka shi kynta. U la ong ba ki nongrep ki khmih lynti ba ki bor sorkar kin phaikhmat lem, da kaba thaw ki lad ki lynti jingiarap halor kane ka jingshem lanot jong ki.
