Shillong, Naiwieng 10: Ka ding kaba la klang bha kala bamduh ia ki jingdon jingem jong kawei ka kudam kaba don ha Demseiniong ha ka janmiet sngi Baar bad la antad ba ka jingjulor baroh kala kot ia ka T.1.25 Klur haduh T.2 Klur.
Ki briew kiba don hapoh kane ka kudam kila ioh ban mih shabar bad la pynthikna ba ym shym la don don mano mano ruh kiban mynsaw.
U trai jong kane ka kudam u Bah Rajesh Syiem ba u dang peit bad ym pat lah ban ai ia ka jingjulor lut baroh, namar kiba bun ki tiar ki tar kidei ruh kiba la buh shabar namar ka jingiaid jong ka aiom lehkmen.
“Ka jingantad ia ka jingjulor kan long kumba T.1.25 haduh T.2 Klur, ngim pat lah ban ioh ia ka jingtip kaba bniah namar kiba bun ki tiar kidei kiba don shabar ia mynta, ngi lah don bun tylli ki tamasa ialehkmen, kumta nga ainguh ia u Blei bun ki tiar kim don lut hapoh” ong u Bah Syiem haba iakren bad ki nongthoh khubor.
Ula ong, ba ki kali pynlip ding kila wan poi mardor, mar ia kem ding bad kila iai bteng ban tem ia kane ka ding kaba la klang bha bad kala bam ruh da ki kynta.
“Ki kali pynlip ding kila pyrshang ban pynlip ia ka ding naduh ka por 3 baje mynsngi” ula ong.
U Bah Syiem ula ong ruh ba kiba shong ha iing building kaba don marjan bad kane ka kudam kila ioh ban mih noh mardor tang hadien ba kala jia kane ka jingpluh ding.
“Ki nongshong wai ha ka building kaba don marjan kila ioh ban mih noh mardor, mar ia mih ka jingkem ding, kam shim la don kano kano ka jingmynsaw” ula ong.
Ia ka daw jong ka jingpluh ding haduh mynta ym pat lah ban tip.
Ki pulit kila ioh jingtip ia kane ka jingpluh ding ha ka por kumba 2:30 mynsngi, tang hadien ba ki skul kila khang bad katei ka jaka kala shlei da ka jingkhapngiah ki kali.
“Kala jia ha ka por kumba 2:30 mynsngi bad kumba phi tip, ki skul kila khang ha katei ka por bad kala don ka jingiabeh hynrei ngi lah pyrshang katba lah ban pynpoi ha ka por kaba biang ia ki kali pynlip ding. Ki kali pynlip ding ha ka jingshisha kila wanpoi hapoh jong ka 7-10 minit hangne” ong u SP ka East Khasi Hills u Bah Vivek Syiem.
Hynriew tylli ki kali pynlip ding jong ka Meghalaya State Police Fire Service kila wan poi mardor ha kane ka jaka bad la wan ruh ban iasnohkti lang da ki shipai BSF, Assam Rifles bad Air Force ban tem ia kane ka ding.
Ka kudam kaba la longtrai da u Bah Rajesh Syiem, kadei kaba buh ia ki tiar ki tar kiba kloi ban kem ding.
“Ka kudam ka don bun tylli ki tyrsok, ki tiar kiba kem ding kloi, ki shuki, carpet,” la ong u SP bad ka bynrap ba ka jinglut jingsep na kane ka jingjulor kadei kaban sa khmih bniah kham hadien.
Ki pulit kila ong, ba ka daw jong ka jingpluh ym pat lah ban lap, hynrei la suba jur ba ka lah ban don ka jingthud jong ka bording elektrik ne Short Circuit ne ka jingshet jingshet hapoh jong katei ka kudam.
“Ki don bun ki tiar kiba kloi ban kem ding, kidei kiba la julor lut hapoh jong katei ka kudam. Ngi dang khmih ia ka daw jong ka jingpluh ding bad ngi lah dep ban iakren bad u trai jong ka kudam, kumta ka lah ban don ka jingthud ka bording elektrik ne lehse don kiba shet jingshet hapoh jong katei ka kudam” la ong u Bah Syiem.
Kaei kaba ngi buh hakhmat eh ka long ban iada ia ka jingim bad ban tehlakam ba kane ka ding kan ym pur sha kiwei pat ki jaka.
“Kam shim la don kano kano ka jingmynsaw. Kaei kaba ngi lah leh nyngkong eh haba ngi lah poi hangne, ngi lah kerkut lut ia kane ka jaka, khmih ia ka rukom pyniaid ia ki kali khang ba ki kali pynlip ding kin ioh ban wan poi ha kane ka jaka, ban phah mih mardor ia ki briew na ki iing kiba don marjan, lah sei lut shabar ia ki tyndong shet jingshet ne Gas Cylinder, khnang ba ka ding kan ym ioh ban pur sha kiwei pat” la ong u Bah Syiem.
Katba ki pulit ki dang iakhun ban tem ia katei ka ding, kila kerkut ia katei ka jaka baroh kawei.
