Shillong, Naiwieng 10 : Ka Meghalaya College Teachers’ Association (MCTA) kala ai ka jingkyrshan kaba pura ia ka Khasi Jaintia Deficit School Teachers’ Association (KJDSTA) hashuwa ka jingsangeh treikam ba khlem pud naduh ka 11 tarik Naiwieng, haba dawa ia ka Sorkar ban jam palat ia ka jingkular bad pynbeit ia ki jingdawa ba sahteng jong ki nonghikai.
Ha ka kyrwoh bala pynmih ha ka sngi Ba-ar, ka MCTA ka khmih ia ka jingsngewkhia bala pynsngew da ka KJDSTA “da ka jingsngewkhia kaba jur” khamtam kito kiba don jingiadei bad ka Centralised Provident Fund bad National Pension Scheme, ka jingpyntreikam ia ka scheme 2023 bad pynsangeh noh ia ka scheme 2026, ka jingbym pynbna lait ki kam nonghikai deficit, jingbym thikna halor ka MACPS, ka jingiai pynslem ban pynlait ia ki tulop bad Dearness Allowance.
“Kine ki dei ki kam kiba khia bha, kiba ktah beit beit ia ka burom ha ka kam, ka jingshngain ha ka pisa pilain bad ka jinglong jingman ha ka jingai jingshakri jong ki nonghikai bad ki nongtrei” ong ka Association.
Ka MCTA ka la ong ba ki jingeh kiba mad da ki nonghikai jong ki skul deficit kim dei ia ka ban peit kum ki mat kiba lait na kiwei pat ki jingeh ha ki kam hikai jong ki jaka pule deficit ha Meghalaya, haba pynpaw ba ka jingbym shai halor ki jingmyntoi hadien ka jingshongthait, ka jingbym don ki kyndon shakri kiba shai bad ka jingpynslem kaba iai jia ha kaban pynbeit ïa ki jingujor, ki la wanrah ïa ka “jingkhuslai bad jingbym shngaiñ kaba khraw hapdeng ki nonghikai ha kylleng ka Jylla.”
“Ym lah ban khmih lynti ba ki nonghikai kin pyndep hok ïa ki kamram jong ki lada ka lawei jong ki ha ka kam bad ha ka liang ka pisa tyngka ka dang sah ha ka jingbym shai,” ka la ong.
Haba kyntu ïa ka Sorkar Meghalaya bad ki bor ba dei peit ban shimkhia ïa ki jingud jingnam, ka MCTA ka la dawa ïa ka jingïakren kaba don jingmut bad ka jingpynbeit kaba kloi bad kaba pynhun ïa baroh.
Ha kajuh ka por, ka MCTA ka la kyntu ïa ki bor pynïaid skul, ki kmie ki kpa bad ki paidbah ban sngewthuh balei ba ki nonghikai ki la shah pynbor ban shim ïa kum kine ki sienjam. Ka la ban jur ba “ka jingiakhih kam dei ka jing kyntait ïa ki kamram jong ka kam hikai, hynrei ka jingïakhun na ka bynta ka hok, ka jingshngaiñ bad ka jingïada ïa ka rukom treikam jong ki jaka pule kiba ki nonghikai ki shakri.”
“Ka Association ka ïeng ryngkat bad ka KJDSTA bad ka kyrmen ba ka Sorkar kan jubab kyrkieh bad ka jingshimkhia kumba dawa ka jinglong jingman,” ong ka MCTA.
