Shillong, Naiwieng 9: Ka jingiakhih kaba khlem buh por pyrshah ia ka Shillong Ropeway Project kala jam sha ka sngi kaba saw hynne ka sngi Nyngkong, ha kaba ka Joint Action Committee kala pynbna ba kan bteng tad haduh ba ia katei ka projek la pynduh ne pynkynriah noh shawei.
Ka Dr Linda Marbaniang, Secretary ka Joint Action Committee against Shillong Ropeway Project, kala ong, ba ka rai ban iaid shakhmat kadei kaba la shim da kaba ia rai lang da baroh ki kmie.
“Ngi kum ki kmie, ngi lah rai ba ngin bteng tad haduh ban da kut, tad haduh ba ka sorkar kan shimkhia ia ka jingkyrpad ka jong ngi” kala ong.
Da kaba kdew halor ka jingbym don kano kano ka jingpynpaw na ka liang ka sorkar, kala ong, “Ngi lah don hangne mynta lah 4 sngi 4 miet bad ka sorkar kala shu sngap jar halor kane. Kumta ngi kwah ba ka sorkar kan wan shakhmat bad ban ai ia ka rai, Kaei kaba ki lah rai?”.
Ka Dr Marbaniang kala ong, ba ka Committee kala dep ban pynpaw shai kdar ia ka nongrim ka jongka, kan ym don kano kano ka jingpynsangeh noh ia ka jingiakhih.
“Ngi lah rai ba ngin ym sangeh ia kane ka jingiakhih. Ngi ngin sah hangne tad haduh ba kin da pynduh ne pynkynriah noh shawei ia ka ropeway project” kala ong.
“Ka Sorkar kala sngap jar haduh mynta. Kam shim la don kano kano ka jingpynpaw na ka liang ka jongki” kala bynrap.
Kala pynkut da kaba ong, “Hooid, Ngin iaid shakhmat bad ka jingiakhih. Ngi ngin ym kynran dien, ngin ym pyndem tad haduh ba kila rai ban pynduh ne pynkynriah noh ia katei ka projek”.
