Shillong, Naiwieng 09 : Ka Khasi Jaintia Deficit School Teachers Association (KJDSTA) ha ka sngi Nyngkong kala pynbna ban sangeh treikam khlem pud (indefinite strike) naduh ka 11 tarik Naiwieng, 2026, halor ki jingdawa bala sahteng la slem bha kynthup ka tulop bym pat siew, ka arrear DA bad ka jingbym pyntreikam ia ka bai bam tynmen bad kiwei ki jingmyntoi.
Ka Association kala shim ia kane ka rai ha ka jingialang bah ba shisien shisnem ba long ha ka 7 tarik Naiwieng, ong u President ka KJDSTA Bah Boswell Pala haba iakren bad ki nongthoh khubor.
“Lyngba jong phi, ngi pynbna ba ki nonghikai deficit bad ki nongtrei jong ka Khasi Jaintia Deficit School Teachers Association, kin pynlong ia ka jingsangeh treikam naduh ka 11 tarik Naiwieng 2026” ong u Bah Pala.
U iathuh ba ia kane ka jingsangeh treikam la khot ban pynlong namar ki jingdawa bala sahteng la slem bha bad kiba dang bteng ban ktah ia ki nonghikai deficit bad ki nongtrei.
“Ki jingdawa jong ka association ki dang sahteng” ong u Bah Pala haba bynrap “Ym shym la pyntrei kam ia ka Centralised Provident Fund, MPS, ka jjingbym pyntreikam ia ka scheme 2023, ka jingpynduh noh ia ka scheme 2026, ka jingbym pyntreikam ia ka synniang CPF ba 10% jong ka tulop jong ngi bad ka MACPS ruh ka dei kawei ka mat”.
U Bah Pala ula pynpaw ruh ia ka jingsngewkhia halor ka jingkynnoh pyrshang ka sorkar ban kyntur ia ka Special Provident Fund (SPF) ha ki kam deficit bad pynkylla ia ki kam deficit sha ka kam composite grant.
“Kaba pynkhuslai jur ka long ruh ba ki don ki skul kibym shym la pynmih jingpynbna ia ki kam deficit ba lait” ula ong.
Halor ka tulop, u Bah Pala ula ong ba ki nonghikai kim shym la ioh satia ia kano kano ka jingtip watla kala poi haduh 9 tarik Naiwieng.
‘Wat ka tulop jong ngi..mynta kala poi 9 tarik Naiwieng, bad ngim shym la iohsngew eiei. Ym shym la don khubor eiei halor ka tulop jong ngi, bad ka la long kamkai myntra” ula ong.
Ula ong ba ka Tnad Pule Puthi, ha ka shithi ba 8 tarik Risaw, 2026, kala kuklar ba ka jingpynkiew ia ka DA ba 51% bad 53%, kynthup ka arear, yn sa pynlait noh hashuwa ka shuti puja.
“Ka shuti puja kala kut bad ngim shym la ioh ia ki” ong u Bah Pala. ‘Ha ka 1 tarik Naiwieng, ki Ophisar ka Tnad Pule Puthi kila leh mynleh kumba kim tip ia kaei kaba ki dei ban leh haba iadei bad ka jingpyn kiew ia ka DA, kaba la pynkhuslai jur bha ia ngi”.
U Bah Pala ula kynnoh ba ka Sorkar kala pyndonkam ia ka miej iakren ban pynslem ia ka hok jong ki nonghikai.
Haba kyrpad ban sngewthuh lang, u Bah Pala ula ong ba kane ka jingsangeh treikam ka dei kaba la khot namar ka jingpang mynsiem, ym ka jingsngewbha. “Ngi kyrmen ia ki khynnah skul bad ki kmie kpa ba kin sngewbha ban sngewthuh lem ia ngi, sngewthuh ia ki jingeh jong ngi bad ban iai shah bad ngi. Ia ki bor pyniaid skul ruh kumjuh, sngewbha sngewthuh bad iai shah lem bad ngi”.
Ia kito kiba pyrshah ia ka jingsangeh treikam, u Bah Pala ula buh jingkylli ba kaei pat ka lynti kaba don ia ki nonghikai.
