Shillong, Naiwieng 09: Kampher wat hadien ba la shah tam shakhmat, hynrei ka Mawpat SC ka la iakhun tyngeh ban lah pyniakhaid da mar ar kol bad ka Mawpdang SC, ha ka lympung SSA Champions Cup 2026, hynne ka lah sngi U Blei, ha SSA Stadium, Polo.
Ka jingiakhun ka long kaba itynnad bad kaba da iakhaid bha hadien ba u Donlad Diengdoh u la lah ban lamkhmat ia ka Mawpdang ban thep ia ki artylli ki kol ba la wan ha ka minit kaba 1 bad kaba 13.
Hynrei ka kynhun ialehkai ka Mawpat ka la ieng iakhun tyngeh bad shwa ban kut ka kylla step, ka la lap ba ioh ia ka kabu ksiar ba kan pynphai shwa ia ka shi kol lyngba Dajiedlang Wanshnong (45’) bad ia ka kol kaba ar ban pyniakhaid ia kane ka jingiakhun la ioh ban thep pat ia ka da u Donboklang Lyngdoh (59’), ka jingiakhun ba la ialehkai hakhmat u paid nongkyrshan jong ki ar kynhun.
Kane kan dei ka jingiakhun ba nyngkong ia ka Mawpdang ha kane ka lympung hadien ba ka la ioh ba kan rah ia ka nam lahduh jong ka U-20 Fourth Division mynta ka snem, kaba ha kane ka kynti u Donlad u dei u rang ialehkai uba ka la shim kylliang (on-loan) bad bynrap da ka jingshim ia kiwei pat ki rang ialehkai kum u Atlanson Kharmaw, Manbhalang Nongmin bad Dibinroy Nongspung, kaba la pynkhlain bha ia kane ka kynhun.
Katba ka Mawpat kaba wan ba-ar ha ka Second Division, kan dei ka jingiakhun kaba ar ia ka ha kane ka lympung kaba la wan hadien ba ka la lah sha ba kan pynliem ia ka Nongkrem ha ka jingiakhun ba nyngkong.
Hadien ba ka Mawpdang ka la tam shakhmat, ka kynhun ialehkai ka Mawpat kam shim la shu ialehkai suki, hynrei man la u rang ialehkai u jong ka, u la ieng iakhun tyngeh ha madan,
Naka liang ka kynhun ialehkai ka Mawpdang I kumba kan jam shakhmat ryngkat bad ka jingjop na kane ka jingiakhun, hynrei ka kylla miet, ka sur ialehkai kaba kham bha ka la noh sha ka kynhun uialehkai ka Mawpat, namar tang hapoh shi katta ba ka la iakhun tyngeh ba ka la lah ban ioh pynphai lut ia ki ar kol ba ka la shah tam shakhmat
Namar ba ka kut ialehkai ka Mawpat ka long kaba skhem hi triang, ka Mawpdang ka la shim ia ka sien jam ban pyrshang ban khyrwit jam kham na jngai ia ki bol, ha kaba la don ruh ki khep ba kane ka jingthmu ka la jan urlong ruh wat sha ka kol.
Kumta ha kaba kut, ki ar kynhun kin hun ban ia sam noh mar shi point hadien ka jingiakhun kaba tyngeh ba ki la sei ha madan iakhun.
Lashai ka sngi pat ka jingiakhun kan dei jong ka Group A ha kaba ka Lawlynti kan mih madan ban iakhun pyrshah ia ka Nongkrem kaban long ha ka por 2:30 nohphai sngi.
