Shillong, Naiwieng 09: Shi hajar tylli ki ksing, kawei ka sur tem. Kawei ka World Record ka dei kaba la buhthong hakhmat eh.
Ka Garo Hills ka dang pynkhreh ban thaw histori haka pyrthei ha kaba ka tamasa Wangala Festival ba 100 ksing, kan pyrshang ban wanrah lang ïa ki 1000 tylli ki Ksing tynrai ban iatem ha kajuh ka lympung bad kajuh ka sur – kum ka jingrakhe iaka jingdap Jubili Ksiar jong ka tamasa.
Ka jingpyrshang kaba thmu ban ïoh rung ha ka Guinness World Records, kan long ka phang pdeng jong kane ka tamasa kaba 50 snem kaba don ha ka histori, kaba la buh ban pynlong naduh ka 11 haduh ka 14 tarik Naiwieng 2026, ha Wangala A-dam, Chibragre, West Garo Hills.
“Ka phangpdeng kaba kongsan jong kane ka jingrakhe kaba pawnam kan long ka khring iaka jingtem 1,000 tylli ki Ksing tynrai ha ryngkat bad ka jingangnud ban iong rung ha ka Guinness World Records,” la ong ka 100 Drums Wangala Festival Committee.
“Kane ka jingthmu kaba pawnam ka wad ban pyni ia ka pateng jong ka put ka tem jong ki jaidbynriew Garo ha ka rynsan National bad International” ka la bynrap.
Ia kane la pynbna da ka 100 Drums Wangala Festival Committee and the Media bad Publicity Sub-Committee of the Golden Jubilee Celebration 2026.
Hadien sanphew snem ba la sdang, kane ka tamasa ka la nangroi sha ka jingrakhe shaphang ka kolshor kaba heh tam jong ki jaidbynriew Garo.
“Ka tamasa 100 Drums Wangala ka dei ka tamasa kolshor kaba heh tam bad kaba la rakhe bha jong ki jaitbynriew Garo, kaba pyni ia ka jinglong tynrai ba riewspah jong ngi, ki jingrwai tynrai, ki jain ki nep tynrai ba itynnad, ki jingshad, ki jingleh niam bad ka mynsiem iatreilang,” la ong ka Committee.
“Ka Jubili Ksiar ka pyni ia ka jingdap san phew snem jong ka jingpynneh pynsah bad kyntiew ia ka jinglong tynrai jong ki Garo,” ka la bynrap.
Kane ka tamasa kaba saw sngi la khmih lynti ba kan khring da ki hajar ngut ki nongwan jngohkai, ki kynhun pyninam iaki kolshor, ki nongshad bad ki riew pawkhmat na kylleng ka Meghalaya, ka thaiñ Shatei Lammihngi bad shabar, kaba pynkylla ïa ka Chibragre sha ka jaka ba kongsan tam jong ka kolshor ki jaidbynriew Garo.
Naduh ka jingtem iaki Ksing tynrai, haduh ki jingshad ba itynnad, ki jingleh niam bad ki jingiabam paidbah jong ka imlang sahlang, ka Jubili Ksiar ka kular ban long ka jingrakhe ia ka pateng, ka jingsarong bad ka jingiatylli, kaba la sanphew snem ha ka jingpynkhreh.
