Chokpot, Naiwieng 09 : U Myntri Rangbah Conrad K Sangma ha ka sngi Nyngkong, ula buh maw nongrim ban shna ia ka surok Chokpot-Kharukol ba T.136 klur, kaba la khmih lynti ba kan pynkhlain ia ki lad pyniasoh ha ka thain South Garo Hills baroh kawei bad pynsuk ruh ia ka leit ka wan ki nongwan jngohkai ha ka thain.
Kane ka surok ba 46.08 km kan sdang na Iew Chokpot, pyniasoh ia ka NH-217 (NH-62 barim) ha Siju bad bteng sha Kharukol. Kan pyniasoh ia 14 tylli ki Shnong— Warima, Budugre, Dagalgre, Kakhija, Kilbomagre, Papa Asakgre, Dobogre, Rekmangre, Paromgre, Dabalgre, Nokatgre, Tolegre, Nengrugittim bad Siju — bad ai jingmyntoi ia 5,783 ngut ki nongshongshnong.
Haba ai jingkren, u Conrad ula ong ba ka district ka dang sahdien bha na baroh ki bynta jong ka Jylla ha ka roi ka par bad ki jingtei la bun snem. Hynrei, u ong ba ka jinglong jingman kala nang kylla hapoh kane ka Sorkar ba ialam ka NPP ba mynta.
U Myntri Tangbah ula ong ba kiba bun ki Sorkar barim bad ki MLA kila pyrshang ban pynioh ia ka jingmynjur na ka bynta kane ka surok hynrei kim shym la seisoh satia. Kane ka Sorkar kala pynioh ia ka song ba T.136 klur bala mang ha ryngkat bad ka Ministry of Rural Development ka Sorkar Pdeng.
Ula ong ba kane ka project kala ioh ia ka jingshimkhia ba hakhmat eh ha Meghalaya, ha kaba ka Ministry kala ai jingmynjur tang artylli ki project ha Jylla. Ula ai khublei ia u Myntri ka Ministry of Rural Development Shivraj Singh Chouhan namar ka jingmang pisa bad ong ba ka jingpyntrei ia kane ka surok kala sdang dang shen.
Kane ka surok la khmih lynti ba kan ai ia ka lynti iaid kaba kham jan na Chokpot sha Shillong bad Guwahati, ka ban pynkhlain ia ka lad pyniasoh hapdeng ka Tura bad ki jaka jngohkai ha ki bynta lam sepngi ka South Garo Hills, bad pynsuk ruh ia ka kit ka bah ki kali kit marbam bad ki marrep.
Nalor ka lad pyniasoh ia ka leit ka wan ki paidbah, kane ka surok kan dei ruh ka lynti ban khaii ia u dewiong bad mawshun sha Dalu bad Gasuapara Land Custom Station. Kan pynsuk ia ka kit ka bah ia ki marrep kynthup ia u sying, u shynrai bad u kwai.
Kane ka project la khmih lynti ba kan pynkhlain ia ka tourism circuit ba kynthup ia ka Warima Fish Sanctuary, Redingsi Wari, Goera Ronggat, Imilchang Falls, Chibanda, Wari Chora, Dombe Wari, Rekman Falls, Renang Falls, Ja’desil Fish Sanctuary bad krem Nongkong. Kan pyniasoh ruh sha krem Siju, Siju Bird Sanctuary, Baghmara bad Balpakram National Park.
Ha kane ka jingialang la iashimbynta lang da u MLA ka Chokpot MLA Sengchim N. Sangma, Rongara Siju MLA Rakkam A. Sangma, ki MDC bad MDC barim, ki bor district bad kiwei kiwei.
