Shillong, Naiwieng 6 : U Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Thohdieng, ula kdat sharud ia ka jingiakhih ka JAC pyrshah ia ka Shillong Ropeway Project bad ong ba ka Sorkar kala dep ban kren shai ia ka nongrim jong ka.
Haba kylli halor ka jingdawa ban pyndam ia ka project bad ban rah noh sha kiwei ki jaka, u Bah Prestone ula pynpaw ba um don eiei shuh ban bynrap ia kane.
“Ngam don eiei shuh ban ong namar hynnin ka sngi, u Myntri ka Tnad Tourism ula dep batai ia baroh kiei kiei halor ka jingshna ia ka ropeway lane cable car” ula ong.
U iathuh ba ka Sorkar ka ieng skhem bad kaei kaba la kren kham shuwa namar ia ka survey bad ki jingwad bniah lah dep ban leh.
“Ngi na ka liang ka sngi ngi la dep batai. Wat ki stad ki jhad jong ki tnad bapher bapher kila leh ia ka survey bad jingwad bniah,kumta ngi ieng skhem bad kaei kaba la dep kren hynnin ka sngi” ong u Bah Prestone.
