Balei ba sngap jar jar ia ka jingiakhih halor ka Shillong Ropeway
Shillong, Naiwieng 06 : Ka Joint Action Committee against the Shillong Ropeway Project ha ka sngi Thohdieng, kala buh jingkylli ia ka jingsngap jar jar jong u Myntri Sorkar bad MLA ka South Shillong Bah Sanbor Shullai halor ka Shillong Ropeway project, bad kynnoh ba ula shu ieh ia ki briew kiba jied ia u.
Haba kren sha ki lad pathai khubor ha ka jingiakhih shong kyllain mungor, ka President ka JAC Deborah Marbaniang kala ong ba u MLA u khlem wan wat ban iakynduh ia ki nongiakhih kiba dei ki nongshongshnong ka constituency jong u.
“Kaei kaba lyngngoh ka long ba kane ka jingjia kala jia ha ka Shnong, ka jingjia hapdeng ki Rangbah Shnong bad ki nongshongshnong, bad kaei kaba pynlyngngoh ka long ba shaei u jah u nongmihkhmat jong ngi” ong ka kong Marbaniang.
“Wat haba ngi iashong hangne, u khlem wan ban jngoh ia ki nongshongshnong. U MLA ula kylla long briew namar jong kine ki nongthep vote jong u baroh. Kaei kaba sngewsih ka long, shaei u nongmihkhmat jong ngi, shaei u MLA jong ngi? kala buh jingkylli.
Ka kong Marbaniang kala pynkynmaw ba ki paidbah ka Laban kila kyrshan ia u Bah Sanbor naduh ki sngi ba u long kum u MDC haduh ba un da long mynta u MLA bad Myntri Sorkar.
“Naduh ka por ba u long MDC haduh mynta ba u long MLA bad Myntri Sorkar, Ngi la kyrshan ia u. Mynta ula shu jah. Ka long leh nohei ban jied ia u briew uba phai da dien ia ngi” kala ong.
“Ngi khmih lynti ia u ban kyrshan, ban ai jingmut ia ngi na ka bynta ka bit ka biang jong ka shnong baroh kawei” kala bynrap bad ong ba u MLA ula ai shibun ki jingkular ha ka por elekshon hynrei ula shu jah rngai mynta.
“Ha ka por elekshon ula kular ia ka bneng ka khyndew, hynrei mynta ula shu jah. Ngi kyrpad ia u Bah Sanbor Shullai ban wan, um dei ban shu ieh ia ngi. Tang namar ba ialade u biang, um dei ban sangep ha ka ban pyrkhat lang ia ngi. Ngi ruh ngi don ia ka hok bankren bad u nongialam jong ka Laban Pyllun baroh kawei” ong ka kong Marbaniang.
Ka kong Marbaniang kala pynpaw ba kane ka jingiakhih kan iai bteng tad haduh ba ka Sorkar kan pyndam noh ia ka project.
Kala dawa ruh ban pyndam noh ia ka jingiatek kular ban aiwai jaka, haba kam ba ki nongshongshnong kim shym la don jingtip ia kane ka jingiateh kular.
