Shillong, Naiwieng 6: Ki bor pyniaid district jong ka East Khasi Hills ki la pyrrkhing ïa ka jingthang bom pataka ha ka jinglehkmen Deepawali ha ka 6, 7 bad 8 tarik Naiwieng.
Ha ka jingbthah ba la pynmih da ka Ophisu District Magistrate, East Khasi Hills, ka bor pyniaid ki la pynpaw ba ïa ki bom lah ban pynbthei tang hapdeng ka por 6 baje haduh 7 baje mynstep bad 8 baje mynmiet haduh 10 baje mynmiet ha kine ki lai sngi, da kaba bud ryntih ïa ki jingbthah jong ka Supreme Court of India.
Ka bor pyniaid ki la kyntu ruh ïa ki nongshong shnong ba kin pyndonkam tang ïa ki green crackers kiba la pynskhem da ka CSIR-NEERI khnang ban pynduna ïa ka jingjaboh ka lyer bad ka jingsawa.
La khang pyrshah ban pynbthei ïa ki bom hajan ki jaka kynthup ïa ki skul, ki hospital, ki dispensary, ki jaka sumar tymmen bad ki jaka ri khynnah.
Ka advisory ka khot ban bud ryntih ïa ki kyndon jingiada.Dei ban buh ïa ki khynnah ha jngai kaba shngain katba ki dang pynbthei ia ki bom, katba ia ki bom sky crackers dei ban buh jngai na ki iing kiba jrong bad ki dieng.
La mana ruh ïa ki nongshong shnong ba kim dei ban pyndonkam ïa ki dawai pynkhuid kti kiba don ka kyiad haba pynmeh ïa ki light diya ne ki bom, namar ba ki lah ban bthei.Ka bor pyniaid district ka la ai jingmut ban sait kti da ka sabon bad ka um ha ka jaka jong kata.
Da kaba pynksan ïa ka jingkitkhlieh ïa ka mariang, ka bor pyniaid district ki la bthah ïa ki nongshong shnong ban pynthikna ïa ka jingpyniakhlad, jinglum bad bret ïa ki jaboh jong ki jinglehkmen ha ka rukom kaba biang katkum Solid Waste Management Rules bad ki kyndon Plastic Waste Management Rules.
Na ka bynta ban pyntip ïa ki jingpynkheiñ aiñ lane ban ujor ïa ki jingujor ha ka por lehkmen, ki nongshong shnong ki lah ban phone sha ka Police Control Room ha u number 0364-2215427, 100 lane 6009196479.
Ka bor pyniaid district ki la kyrpad ïa ki paidbah ban rakhe ïa ka Deepawali da ka jingkitkhlieh katba ki dang pynthikna ïa ka jingshngain jong ki paidbah, ka jingiada ïa ka mariang bad ki jinglehkmen kiba suk.
