Shillong, Naiwieng 06: Ka Shillong Ropeway Project ka la kylla long ka jingiatyngkhuh ba khlem ka jngia pyndem – ka sorkar ka ong ba kam lah ban pyndam ne pynkynriah ia ka projek katba ki nongiakhih ki ieng skhem ba kin nym ailad ban pyntrei ia kane ka project ha u Lum Shyllong.
Kane ka jingiatynjuh bor kala paw ha Barik ha ka sngi Thohdieng, ka jaka kaba ka Joint Action Committee (JAC)! Against the Shillong Ropeway Project ka la pynlong ïa ka jingiakhih daka ba shong kyllain mungor ha khmat u mot jong u Kiang Nangbah, shisngi hadien ba ka Sorkar ka la pynpaw shai ba ka jingïateh soskular aiwai jaka kaba la soi saw snem mynshwa, ka pynlong ïa ka projek ban neh ha ka jaka kaba la ithuh, bad ba projek ka dei kaba jngai 3.15 kilomitar na ki tyllong um.
Ka dkhot ka JAC, Kong Venitia Mawlong, ka la pynshai ba kane ka jingïakhih shong kyllaiñ mungor kam dei ka jingsdang thymmai jong ka jingïakhih, hynrei ka dei ka jingpynkynmaw ïa ki paidbah ba kane ka jingïakhih ka la ïaid naduh kaba nyngkong eh.
“Ma ngi kum ka JAC ngi la iamih sha surok, bad kane kam dei ka jingsdang jong ka jingïakhih, hynrei ka long ban pyni sha ki paidbah ba ka JAC kam shym la shongthait naduh kaba nyngkong eh,” ka la ong.
Haba kynthoh ia u Myntri ka tnat Tourism u Bah Paul Lyngdoh, ka Kong Venetia kala ong ba ka jingkren jong u ba ym donkam ban iam ka pynpaw ia ka jingbym sngewthuh ia kaei kaba ki kmie jong ka katei ka thain ki iakynduh, bad ka la long kum ka jingthombor shimet ia ki.
“Nga kwah ban kren shai khamtam eh ïa u Myntri ka tnat Jngohkai Pyrthei, Bah Paul Lyngdoh, uba dei u 12 bor, kumno u lah ban ong ba ym donkam ban iam ne jaw ummat? Hato u sngewthuh ïa kaei kaba ngi ki kmie ngi mad marwei marwei? Kam dei ban don kano kano ka jingkynthoh shimet pyrshah ïa ngi,” ka la ong.
Ka la pynkynmaw ia ka mynnor jong u Bah Paul Lyngdoh kum u president ka KSU, bad ong ba ha kitei ki por ki paidbah ki shaniah ia u Bah Paul ban lum lang ia ki khun Khasi bad kylli kylla mynta, balei ba uta u juh u nongialam mynta u ieng pyrshah ia ki.
“Balei mynta u pyrshah ia ngi, u byrngem ia ngi lyngba kita ki buit jakhlia jong u,” ong ka Kong Venetia. “Sngewbha wat byrngem ia ngi ki paidbah, wat pyntieng da ki buit jakhlia jong phi, sngewbha buh ia ki buit jakhlia jong phi ha iing jong phi.”
Wat la u Bah Paul u don shabar ri, hynrei ka Kong Venetia kala ong ba ka khubor ka dei ban poi sha u bad ka JAC kam shongthait.
Haba kylli, hato ka JAC kan phai khmat shaka Meghalaya High Court, ka Kong Venetia kala ong ba ka JAC kan nym ujor shaka High Court na ka bynta ban tuklar halor kane. Ka mukotduma ha iingbishar, ka la kynthoh, kan pynkylla ia ka jingiakhun na ki paidbah sha ki nongiasaid ain na baroh arliang bad kan pynkut noh ia ka jingiakhih ha surok.
“Ngin sa ialeh hi katba lah,” ka la ong.
Halor ki tyllong um, ka Kong Venetia ka la ong ba ka pynsngewsih ia ka ban iohi ia u briew uba la ieid ia ka shnong ka thaw, mynta, ha ki kyntien jong ka, u pyndonkam ia ka shuki ban byrngem kylla iaki paidbah nong shong shnong.
“Lada u Bah Paul um don ha ka shuki mynta, un jin da don ryngkat bad ngi mynta namar ba u dei u briew uba ieid ia la ka shnong ka thaw ha kawei ka por hynrei mynta u don ha ka kyrdan, u don ha ka shuki, ka shuki mynta lehse ka la nang khlain shuh shuh kumta u byrngem, ym tang ia ngi ki paidbah ka Raid Laban hynrei u la byrngem ia ka Jylla baroh kawei”.
U chairman ka Greentech Foundation u bah H Bansiewdor Nonglang haba ai jingkren ha kane ka jingialang u la ong ba ka jingiakhih hadien 4-5 bnai halor kane ka mat ka long ban iathuh paidbah ia ki jingshisha kiba ka sorkar kam shym la iathuh.
“Ngi kwah ban pyntip sha ki paidbah ba kin tip ruh ia ki jingshisha, haduh mynta ka Sorkar kam pat iathuh ia phi ia ki jingshisha,” ong u bah Nonglang.
U Bah Nonglang ula ong ba ka jingiatai paidbah ka la pynleit jingmut ha ki 544 tylli ki dieng kiba la pom. Hynrei ki kot ki sla, u la kam, ki pyni ia kaei kaban mih ha ki Terminal.
“Hato phi tip, ha ki artylli ki terminal kiei ki jait jingtei kin mih, hato phi tip kin wan ki Restaurant, ki Food court, ym dei ba kren tang da ka kyntien, hangne ha ka jingthoh ka don baroh” u la ong.
U Bah Nonglang ula ong ba kane kan plie lad ban pynlong jaka shimet bad ka jing pynlong jaka khaii pateng ia u Lum Shyllong.
“Lada ngi duh noh mynta, wat kren shuh shaphang u Lum Shyllong nangne shakhmat,” u la ong.
U bah Nonglang u la ong ba ka GTF kala iatreilang bad ka JAC hadien ba kala bishar bniah iaka jingud jingnam ki dkhot ka JAC wat hapdeng ka jingshah kynthoh ha ka sorkar.
