Shillong, Naiwieng 4: U Myntri Rangbah ka jylla u Conrad K Sangma ha ka sngi Balang u la kyntait ia ka jingkynnoh u nongialam ka liang pyrshah Dr Mukul Sangma ba ka NPP ka khroh bad pynbiej ïa ki MLA ban ïa snoh bad ka.
Halor kane ka jingkynnoh, u Sangma u la ong ba ka jingpyniasoh ki MLA ka UDP sha ka BJP bad sha ka NPP ka dei ka rai jong ki hi.
“Ha kane ka jinglong jingman kaba mynta, ki MLA na ka UDP ki la rai ban iasoh bad ka BJP, bad 3 na ka 4 ngut ki la rai ban iasoh bad ka NPP.Ka dei ka rai kaba la shim ha la ka jong ka kyrdan bad haba la shim ia ki rai khlem kano kano ka jingpynbor ne kano kano ka jait jingpynbor na ka liang jong ngi,” u la ong.
U Sangma u la ong ba watla ka dei ka jingkylla kaba bha na ka bynta ka NPP, hynrei ym shym la pynbor ei ei.
“Ngi sngewkmen ba ki la ïasoh bad ngi bad kaba shai kum ka seng saiñpyrthei ka long kaba bha na ka bynta jong ngi hynrei ha kano kano ka por ym shym la don kano kano ka jait jingpynbor ne kano kano ka jingpynbiej kaba la hap ban leh ban pynbor ïa ki ban ïasoh bad ngi kaba ym shym la long satia,” u la ong.
“Da ka mon sngewbha bad da ka jingkmen ban iasoh bad ka NPP,” u la bynrap
