Shillong, Naiwieng 4: Ki bor pyniaid district jong ka East Khasi Hills ha ka sngi Balang kila leit ban plie noh ia ka jingshah khang tala jong ka ophis treikam jong ka Ropeway Company ha Lower Terminal Point, Madan Laban, kaba la shah khang tala ha ka Khasi Hills Autonomous District Council (KHADC) ha ka 27 tarik u Risaw.
U Deputy Commissioner ka East Khasi Hills u Abhilash Baranwal ula ong, ba katei ka jingleh kadei kaba la shim katkum ka jingbthah jong ka sorkar bad katkum ka jingioh jingmut na ki nongiasaid aiñ.
“Da kaba bud ryntih ia ka jingbthah jong ka Sorkar Meghalaya bad kumjuh ruh na ki jingpynpaw jong kiba shemphang bha ia ka aiñ, kiba la pan jingshai da kane ka ophis bad ka Sorkar Meghalaya, kumta kane ka ophis kala iaid shakhmat ha kaban plie noh ia katei ka jingkhang tala ia katei ka ophis bad la aiti biang sha ka tnad Jngohkai ban sdang biang ha katei ka jaka” la ong u Baranwal haba iakren bad ki nongthoh khubor.
Ki Magistrate ryngkat ka jingsynran ki pulit kila pynpait ia ki tala ha ka jaka ban rung bad ha ka ophis da kaba pyndonkam ia ki tiar hynne ka step.
Haba kylli la ki kam kin sdang biang noh, ula ong “Ngi dang shu dep ban pynpait ia ki tala ha katei ka jaka bad ban aiti biang sha ka tnad jngohkai bad ha kaba iadei bad ka jingbteng biang ia ka kam, lah ban pynthikna na ka tnad sorkar”.
“Lada phi ong, ban sdang biang ia ka kam, katei kadei ka rai kaba dang sahteng bad ka Sorkar Meghalaya. Ngi lah ioh pdiang ia ka jingbthah ban pynpait ia ki tala kiba la khang ia katei ka jaka bad ban aiti biang sha ka tnad, ia kaba ngi la pyndep hynne ka sngi” ula ong.
Ula bynrap, “Ngi ngim dei kiba pyniaid ia katei ka projek. Ka tnad kadei kaba la pyniaid ia katei ka projek bad ka kamram ka jong ngi kum ki bor pyniaid district ka long tang ban plie noh ia katei ka jaka kaba la shah khang tala bad ban aiti biang sha ki”.
