Ka FCRA Amendment Bill 2026 ka ai jingiada ia ki jaka leh niam ym kum ka Act 2010
Shillong, Naiwieng 02 : U Chairman ka Joint Parliamentary Committee on the Foreign Contribution ( Regulation) Amendment Bill, 2026, Sanjay Jaiswal ula pyntip ba haduh T.22,000 klur ka pisa ka wan poi kum ka synniang nabar ri ha ka Ri India baroh kawei bad 94% na kane ka pisa ka leit sha ki seng treimon sngewbha katba 6% ka leit sha ki seng niam.
U Jaiswal ula pyntip ia kane haba iakren bad ki lad pathai khubor hadien ka jingiasyllok syllok bad ki kynhun bapher bapher kynthup ki seng niam ha Shillong hynne ka sngi Nyngkong.
U Jaiswal ula iathuh ba ka Committee kala jied ia ka Shillong kum ka sien shong bishar ba nyngkong eh shabar ka Nongbah ka Ri hadien ba u Myntri Rangbah Conrad K Sangma ula kyrpad ia ka Committee ban wan sngap markhmat ia ka jingeh bad jingsngewkhia jong ki kynhun ka thain Shatei Lam Mihngi.
Kat kum ka jingong jong u, “Ka Amendment sha ka FCRA Act 2026 ka long kaba donkam namar ka Original Act ka dei ha u snem 2010. Hadien ka jingiasyllok ha Parliament, la rai ban thung ia ka JPC bad ka JPC kala wan sha Shillong. Kane ka dei ka sien shong bishar ba nyngkong eh shabar ka Delhi”.
“U Myntri Rangbah Conrad K Sangma dalade ula kyrpad ia ngi ban wan sha Meghalaya bad ban sngap ia ki jingeh jong ki kynhun bapher bapher kiba ioh pdiang ia ki synniang pisa nabarri. Ngi la shim jingthoh ia baroh ki jingai jingmut”.
U iathuh ba ki kynhun kila ai ia ki jingai jingmut kiba tei bad ngi la bthah ba kin aiti ia ki jubab kiba bniah hapoh ka 15 sngi, hadien kane ka Committee kan sa pynkhreh ia ka Bill kaba khatduh.
Kane ka hearing kala iohi ia ka jingiashimbynta jong u Archbishop ka Guwahati bad kumba 40 tylli ki Kynhun na Meghalaya, Manipur, Nagaland bad Assam. Baroh lang, 84 tylli ki kynhun kila pynpaw ia ka jingkwah ban wan mih hakhmat ka Committee, ong u Jaiswal.
Kane ka Committee kan sa pynlong ruh ia ka jingshong bishar ha Kochi bad Chennai shuwa ban shim ia ka rai.
Kat kum ka jingong jong u, ka India kala iohpdiang kumba T.22,000 klur shisnem na ki jingnoh synniang pisa ba wan nabar ri sha ki kynhn bapher bapher. U iathuh ba tang 6% na kane ka pisa ka leit sha ki seng niam bad 94% ka leit sha ki seng trei mon sngewbha bad kiwei kiwei.
Halor ki jingkynthoh pyrshah, ula ong ba Act 2010 bala pynlong ain hapoh ka Sorkar UPA kala aibor ia ki Home Secretary ki Jylla bad Principal Secretary bad ka don ia ki kyndon ba shah ban shimti ia ki jaka leh niam, katba kane ka Bill ba thymmai ka ai jingiada ia ki.
“Ki don katto katne ki jingsngew artatien mynta, hynrei ka Bill 2010 ka kren shai ba wat ki Temple ne ki Iingmane lane ki Mosque ki lah ban shah shimti ha ki Home Secretary. Ka Bill ba thymmai ka ong ba ki Temple lane ki Iingmane lane ki Mosque ki dei ban iai neh kumba ki ong, bad ym don mano mano ruh ba lah ban tuklar. Kane ka long shai bha” ula ong.
Halor ki jingeh ban leh registration da ki kynhun kiba rit, ula ong “Ngi la shim ia ki jingai jingmut na baroh ban pynlong ia kane ka Ain kaba ai jingmyntoi ia kitp kiba kwah ban leh bha ia ka imlang sahlang hynrei kan khang lynti ia kito kiba kwah ban buh jingma ia ka jingshngain ka Ri”.
Ula pynshai ba ka SBI Account ha Delhi ka dei ka entry point ban buddien ia ki jingwan poi ka pisa nabar ri bad ia kane ka pisa la phah pat sha kino kino ki bank ha India, bad la khang ia ki seng sain pyrthei ba kin ioh ia ka synniang pisa nabar ri.
