Shillong Risaw 30: Ka Nongkseh SS&CC kala wanphai nadien ban pynrem ia ka Godavari FC da 3-1 ha ka jingiakhun ha ka I-League 3 Group C, kane kala pynlong syndon ia ka Nongkseh ban ioh rung sha ka Final Round kum ka Lahduh jong kane ka Group da kaba ioh khur 9 Point ha ka jingiakhun kaba la long ha SSA Stadium, Shillong ha ka sngi Thohdieng.
Ka Godavari FC kala ioh thep ia ka kol ha ka minit kaba 14 lyngba u V. Sunil ia kaba la pynbuh bha ia ka bol da u Suhail uba la shut najngai ia ka bol, ha kaba ki nongialehkai ka Nongkseh kila mut ba u Sunil ula tam lypa ne ‘Off Side’ hynrei u rephri um shim la rah ia ka lama bad u Sunil ula rah ia ka bol bad thep syndon ia ka kol.
Hynrei ka Nongskeh kala ioh ban pyniakhaid noh tang hadien jong ka 4 minit ha kaba u Kynsaibor Lhuid ula shut jam bha ia ka bol kaba la pynlong ia u nongap kol ka Godavari u Lakshay M ban ialeh ban iada ia kane ka bol ban rung shapoh kol hynrei namar ba um shim la ioh ban kem bha, u Shano Tariang uba la mareh sted bha ula ioh ban thep ia ka kol ha ka minit kaba 18.
Ha ka kylla miet ka Nongkseh kala bteng ban ialehkai bha, u Aenam Graffenberg Jyrwa ula pynbuh ia ka bol kaba biang bha ia u kapten Hardy Cliff Nongbri ban thep ia ka kol ha ka minit kaba 68 hynrei um shim la lah satia ban thep kol. Hadien 7 minit u Aenam ula pynai biang ia ka bol ha u Hardy bad ha kane ka khyllipmat ruh u Hardy um shim la lah satia ban thep ia ka kol.
Ka Nongkseh kala ioh ban thep ia ka kol ka baar ha ka minit kaba 74 lyngba ka jingshut u Hardy ia ka Corner Kick bad u Mebankhraw ula kynthih shajrong bad pyndei da ka khlieh ia ka bol bad kala leit rung shapoh kol.
Ka Nongskeh kala ioh ban thep sa ia ka kol kaba 3 ha ka minit kaba 77 ha kaba u Dawanchwa Carlos Challam ula maitphang ban pynpoi ia ka bol sha u Hardy bad nangne u Hardy ula pashat kylla ia ka bol sha u Kynsailang Khongsit ha ka liang kamon. U Kynsailang ula shut ia katei ka bol ha kaba u Dawanchwa ula rynsied ialade bad pyndei da ka khlieh ia ka bol bad kala leit rung beit beit shapoh kol kaba la pynthikna syndon ia ka Nongskeh ban tam da 2 kol ia ka Godavari bad ban ioh khur ia ka 3 point.
Ka Nongkseh kala rung ha kane ka jingiakob hadien ba kala mad ia ka jingshah pynrem ha ka Lakecity FC bad kala donkam ban jop ia kane ka jingiakhun pyrshah ia ka Godavari ban ioh rung sha ka Final Round.
U Shano Tariang ula ioh ia ka khusnam ‘Player of the Match’ halor ka jingialehkai bha bad ka jingnoh synniang ka jongu ban thep ia ka kol kaba pyniakhaid kaba la ai mynsiem biang ia ka Nongkseh ba kan bteng ban ialehkai bha.
Ha kane ka jingiakhun 3 ngut ki nongialehkai ka Godavari FC kila ioh ia ka Yellow Card, katba u Chesterpaul Lyngdoh udei u nongialehkai ba marwei jong ka Nongskeh uba la ioh ia ka Yellow Card ne ka jingmaham.
Da kane ka jingjop ka Nongkseh kala long ka lahduh jong ka Group C da kaba ioh khur 9 point bad kala ioh rung syndon sha ka I-League 3 Final Round.
