Ioh sopsop ka Association ia ki kot ki sla na ki briew bym kwah pynpaw kyrteng
Shillong, Risaw 30 : Ka Meghalaya High Court Bar Association ha ka sngi Thohdieng kala kynnoh ba u Advocate General Amit Kumar ula pan haduh T.1.50,000 man ba u leit mih sha ki mukotduma ha ki District Commercial Court-kaba la shna bill palat T.1 klur-watla ula kam hakhmat u paidbah ba um ju pan palat ia ka dor bala mynjur da ka Sorkar kaba long T.20,000 ha High Court bad T.40,000 ha Supreme Court.
Ka Association kala ong ba kine ki sakhi satar kila wan ha ka dur jong ki kot ki sla bala thep ha ka envelope, bala phah da ki briew ki bym kwah pynpaw kyrteng.
“Ngi la ioh ia ka envelope bad katto katne ki kot ki sla hapoh, lehse da u briew uba ngam kwah pynpaw kyrteng, bad kaei kaba thoh ha ka envelope ka dei ka kyntien Confidential. Ynda ngi la plie ia ka, ngi iohi ia kaei kaba pynkyndit lut ia ngi baroh” ong u Secretary General Kishore Gautam.
“Kane ka iadei bad ka jingiakhih jong ngi ia kaba phi iatip bha kaba la iaid mynta la katto katne bnai. Ngi la dawa ban weng ia u Amit Kumar kum u Advocate General” ula ong.
U Gautam ula pynkynmaw ia ka jingiakynduh lad pathai khubor u Amit Kumar ha ka 3 tarik Nailur. “Ula jubab ia baroh ki jingkynnoh jong ngi da kaba ong ba kaei kaba la kynnoh pyrshah ia u halor ka jingpan palat pud ia ka pisa, ka Jylla kala pynlut bun bah ka pisa halor ka Ophis u Advocate General ka long kaba bakla. Ula ong ba u don ia ka dor bala buh-T.20,000 shi sien leit mihkhmat ha High Court bad T.40,000 shisien leit mihkhmat ha Supreme Court”.
“Mynta, kaba thamula, ki kot ki sla ba ngi ioh mynta ka sngi ki don ia ki bill bala iakren halor ka mukot duma ym ha High Court, ym ha Supreme Court hynrei ha ki Commercial Court, kiba dei ki district court ka Jylla, kaba la poi palat ia ka T.1 klur. Hangne u Amit Kumar ula pan T.1,50,000 shisien leit mihkhmat” ong u Gautam.
“Kane ka bill ka long jong u 2021,2022, 2023, Ngam da thikna bha ia ka tarik hynrei nga thikna ba kane ka bill ka dei kaba la dep siew. La ia ki bill lah dep siew ne em, ka jingshisha hi ka long ba u Amit Kumar ula kyntait hakhmat ki lad pathai khubor. Ki jingkynthoh kila mih ha kynroh, kala shai kdar b aula pan palat ia kaei kaba u dei ban pan” ula kynnoh.
U Gautam u ong ba kane ka dei kaba batai balei ba ia ka RTI lah kyntait ban ai jubab.
“Ta ka daw ia ka RTI ba ngi aplai ma ngi, kila kyntait ban ai da kaba sot ia ka kyndon 8, kaba nga kum u Nongiasaid ain ngam mynjur satia. Ngi la aplai ia ka appeal bad dang shen nga la ioh pdiang ia ka shithi ha kaba ka Tnad kala pan ia ka por ba 15 sngi khnang ba kin shim ia ka jingbit na u Amit Kumar. Mynta hadien ba ngi la iohpdiang ia kane, ngi la sngewthuh, ia ka daw balei ba kyntait ban ai ia ki jingtip sha ngi hapoh ka RTI Act namar ka Sorkar kam kwah ia ki paidbah ba kin tip ia ka pisa ba ka pynlut bad kane ka pisa ka dei beit thik tang jong kawei ka mukutduma” ula ong.
“U nongiasaid ain u lah ban pan dor kat kaba u kwah, hynrei ia u nongsaid ain ka Sorkar, ia u Advocate General, ka da don da ka jingbuh dor. Mynta ngi buh jingkylli ba halor kano ka nongrim ba ula phah bill haduh T.1,50,000 shisien leit mihkhmat, mano ba ailad ia kane ka jingsiew? Ka Sorkar kan siew mo kat kaba u Amit Kumar u pan kum ka bai leit mihkhmat, bad klet ia ka dor ba la buh” ula ong.
Halor ka sienjam ba bud, u Gautam ula ong “Ngi dang ap ia ka jubab jong kito ki RTI kiba u appellate authority ula pan por 15 sngi, ka ban sa kut noh ha u Naiwieng. Ngin ap ia ka jingwan kito ki jubab bad ryngkat lang ngin sa jam sahkhmat namar kane ka jingtip ba ngi ioh mynta ka sngi, ka dei tang jong kawei ka kam. Lyngba kito ki RTI ngi la khmih lynti ban nang paw pyrthei shuh shuh kiei kiei baroh”.
