Shillong, Risaw 30 : Ka Khasi Students’ Union-Laban Circle kala kynnoh ba ki bor district bad ki Pulit ba kila pyndonkam palat ia ka bor bad pyntieng pynsmiej ia ki dkhot ka JAC kiba dei ki kynthei, kiba pyrshah ia ka Shillong Peak Ropeway Project ha Laban Pyllun bad dawa ia u Myntri Rangbah Conrad K Sangma ba un tuklar.
Ha ka shithi sha u Myntri Rangbah ha ka sngi Thohdieng, u President ka KSU Laban Circle Jason C Laloo bad General Secretary Shiningstar Chyne, kila ong ba ka jingphah ia ki Pulit bad ka kynhun Special Operation Team (SOT) pyrshah ia ki dkhot ka JAC ka dei ka jingthmu ban pyntieng pynsmiej ia ki ba kin sangeh noh ia ka jingiakhih.
“Ha ka 28 tarik Risaw, katba ki dkhot ka JAC ki dang ap ia ka rai jong ki Rangbah Shnong, kala mih ka jingïakren bad jingïatai hapdeng kine ki arliang mamla, hynrei, kane kam dei satia ka jingïakynad kaba don ka jingma ne ka jingthombor, hynrei la phah pynban ia ki Pulit bad ki SOT sha kane ka jaka. Kane kam dei kaei kaei ruh hynrei ka jingpyni ia ka bor ban pynrtieng ia ki dkhot ka JAC ba kin kynran dien” ong ka KSU.
Haba kynnoh ia ki jingleh donbor kiba la jia dang shen, ka KSU kala kdew ia ka public hearing ba dang shen jong ka Shree Cement ha East Jaintia Hills.
“Ki paidbah kiba pyrshah ia ka jingshah knieh jaka ha ki kompani kiba heh kim shym la iohlad ban iashimbynta ha ka hearing, kila shah byrngem bad shah shoh. Don kiba hap phet na la ki shnong ha ryngkat ki bahaiing hasem ba sheptieng iala ka jingim. Ki bor district bad ki Pulit kila iatreilang bad kine ki kompani baheh bad pynkylla bad pynbeit bakla ïa ki jingbit bad ki kot ki sla kiba ïadei bad ka mariang” kynnoh ka shithi.
Ka KSU kala kynnoh ba kum kine kijuh ki buit la pyndonkam mynta ha Laban.
“Ka jingphah ia ki SOT pyrshah ia ki nongshongshnong jong ka thain khamtam ki kynthei ka dei ka bym lah satia ban pdiang satia. Ka Seng ka don ruh ka jingsngewkhia kaba jur ba ha ki sngi ban wan, kine ki longkmie kiba la rangbah, kiba long kum ki kmie jong ngi, bad kiwei pat ki nongïashim bynta kin shah byrngem, bad lehse ki pulit kin pynngat ïa ki ha ki mukotduma kiba lamler tang ban pynsangeh ïa ki na kino kino ki jingïakhih ha ki por ban wan” maham ka KSU.
Haba pynpaw ba kam long pyrshah ia ka roi ka par ne project ka sorkar, ka KSU ka ong ba ka Sorkar kam dei ban phai lyndet ia ki jingsngewkhia kiba iadei bad ka mariang.
“Ka Seng kam don satia kano kano ka jingpyrshah ïa ki project ne ki jingthmu jong ka Sorkar. Hynrei, kano kano ka project ne ka jingthmu jong ka Sorkar ka dei ban ïoh ïa ka jingmynjur bad jingkyrshan jong ki paidbah, bad kam dei ban ktah ïa ka jinglong jingman ba ïahap bad ka mariang. Ka kaiphod ba lpynmih da ka Sorkar, la pyni ba katei ka project kan ym don kano kano ka jingktah ïa ki tyllong um ne ïa ka mariang hi baroh kawei. Hynrei, ka JAC bad ki riewstad ha ka liang ka mariang ki pynpaw pat da kawei ka jingsngew. Kumta, ka long kaba eh ïa ki paidbah ban shaniah tylli ha ki jingkren bad ki kaiphot jong ka Sorkar, khamtam eh hadien ki jingshem kiba la jia ha East Jaintia Hills District, ha kaba bun na ki kaiphot, ki jingbit bad ki Environmental Assessment Reports ki la don ka jingsuba ba la pynkylla bad pynkhreh thok” kala ong.
Ka KSU kala kren ruh halor ki khubor kibym pat pynshisha ba kan don ka jingtei ïa ka surok thymmai naduh Sericulture Farm haduh Sawmer ha ki snem ban wan. “Lada ka long shisha kumta, la sngewthuh ba kane ka surok ka lah ban don jingïadei bad ka Ropeway Project. Lada pynlong ïa kum kine ki jingtei, kan sa don ka jingpom ïa ki dieng bad lehse kan ktah ruh ïa ka catchment area, kaba long kawei na ki tyllong um ba kongsan jong ka thaiñ, bad kaba lah ban pynlong ïa ka jingpynjot ïa ka jingpynbiang um ha ka thaiñ” kala ong.
Ka KSU ka pynpaw ruh ba ki bor pynïaid District kim lah ban kyntait ïa ka jingkitkhlieh jong ki bad pynkit ïa ka lyngkor jong ka jingkitkhlieh halor ka Public Hearing sha ki Dorbar Shnong bad ki Rangbah Shnong, ban pynshai ïa ki paidbah shaphang ka jingktah jong katei ka project ïa ka mariang bad kiwei kiwei ki mat kiba ïadei bad ka project.
“Ia ka kam jngohkai bad ka iohkam ioh jam dei ban kyntiew hynrei ym ka ban ktah ia ka mariang” bynrap ka KSU haba kyntu ia u Myntri Rangbah ban leh eiei noh mardor.
