Shillong, Risaw 26: U Nongseng ka United Democratic Party (UDP) bad Symbud Myntri Rangbah barim bah Bindo M Lanong u la ong ba um shym la pyniasoh bad kano kano ka party watla u la shah kyntait tiket na ka UDP ha u snem 2023, bad ba ki nongrim jong ka UDP ki dang tuid ha ka snam jong u wat haba 8 ngut ki MLA kila phet shaka BJP bad 3 ngut shaka NPP.
Katkum ka jingong jong u, u dei u “nongshah shet kylla ba nyngkong haka UDP haka jingialam u President ba mynta.
Haba kylli hato u dang don bad ka UDP, hato un wanphai biang ban pynim biang ia ka party, ne un leit pyniasoh sha kawei pat ka party, u Bah Bindo u la ong ba um pat ju phet seng ha ka jingim sain pyrthei kaba la iaid palat 53 snem.
“Nga la rung ha ka sain pyrthei ha u snem 1972, nga la long u MDC ba nyngkong ha u snem 1972, naduh katei ka por ngam pat ju phet seng shano shano ruh. Ka kylla party na ka APHLC sha ka HPU, na ka HPU sha ka UDP hynrei ngam shym la kylla. Ngam kyrshan ban ia phet seng,” la ong u bah Bindo.
U la kynnoh ba u la shah kyntait tiket na Nongkrem ha u snem 2023 watla u dei tang ma u, u nongialam ka UDP uba kloi ban iakhun nangtei ka constituency.
“Na ka bynta ka jingtip jong phi, nga dei u nongshah shet kylla ba nyngkong eh,” u la ong. “Ha u snem 2023 nga la leit ban iakhun na Nongkrem. Ym pat don kyrtong ka UDP ha kata ka por. Kumta nga la apply. Nga la ai shithi ha ka por ba ngan kynriah noh na Malki-Laitumkhrah namar ki daw kiba bun. Nga la mihkhmat kham mynshwa ia ka bynta jong kata ka thain Madanrting.”
“Haba nga leit ban Apply ticket, ym shym la ai tiket ia nga, hynrei la ai tiket ia uwei u briew bym dei UDP- u paralok jongnga u bah Lambor Malngiang. Um shym la don ha ka UDP hynrei u la ioh ia ka tiket. Ia nga uba dei u briew ka UDP, la kyntait. Hadien ba la kut ka elekshon, u la mih noh na ka UDP,” ula ong.
U bah Bindo u la iakhun kum u kyrtong shimet hadien ba u la shah kyntait tiket.
“Naduh katei ka por, ngam lah ban ong ba nga dei ne ngam dei shuh u dkhot jong ka UDP hynrei ngam shym la leit sha kano kano ka party. La kyntait tiket ia nga, nga la iakhun kum u kyrtong shimet hynrei ngam shym la leit sha kano kano ka party ha katei ka por, bad mynta ruh,” u la ong.
Wat hapdeng ka jingshah kyntait ticket, u la ong ba ka mynsiem jong u ka iai neh bad ka UDP.
“Ka dohnud jong nga, ka jingmut jingpyrkhat jong nga, ka jingsngew jong nga ki dang don bad UDP, naduh ka por jong ka APHLC ba nga jop ia ka elekshon kaba nyngkong kum u MDC na ka APHLC, nangta ka HPU ka la wan, nangta ka UDP ka la wan ha u snem 1997. Ka UDP ka dang don ha ka snam jong nga, ka jingmut jingpyrkhat jong ka party, ki rekod jong ka party, ki don ha ka dohnud jong nga.
“Hynrei mano ba pdiang ia kata, mano ba ithuh ia kata, khamtam lada u president um leh, ngam don ei ei ban duh. Ym don mano mano ba lah ban shim noh ia ka na nga. Ha ka dohnud jong nga dang don ia ka UDP” ula ong.
Ka UDP kawei na ki seng sain pyrthei riewlum ba la rim tam ha Meghalaya, mynta ka la sah sa tang uwei u MLA hadien ka jingphet seng kaba bun tam ha ka histori jong ka Party.
