Kyrshan u Dr WR Kharlukhi ia u Bah Pala ha ka Shillong LS Byelection
Shillong, Risaw 26 : U State President barim bad MP ka Rajya Sabha Dr WR Kharlukhi ha ka sngi Nyngkong, ula pynbna ban ai jingkyrshan ia u kyrtong ka Congress Bah Vincent H Pala ha ka elekshon shiteng samoi ka Shillong Lok Sabha, haba pynpaw ia ka jingpyrshah ka Conress ia ka Foreign Contribution Regulation Amendment Bill, 2026.
Haba kren sha ki lad pathai khubor, u Dr Kharlukhi ula pynkut ia ka jingiakren halor ki sienjam ba u thmu ban shim hadien ba iehnohkam na ka NPP ha kine ki arbnai bala leit noh.
“Kila don shibun ki jingiakren hadien ba nga la iehnohkam na ka NPP, ki briew kila kylli ia nga sa kaei ba ngan leh. Ha kane ka jingiakren bad ki lad pathai khubor nga kwah ban pynbna ia kaei ka sienjam ba ngan shim. Nga la rai ban kyrshan ia ka Congress bad u kyrtong Vincent H Pala ha kane ka elekshon shiteng samoi ka Shillong Lok Sabha” ula ong.
U Dr Kharlukhi ula pynpaw ba u long pyrshah ia ka Amendment ka FCRA kumba ka long mynta.
“Ka FCRA Amendment Bill 2026, Nga pyrshah jur bha kumba ka long mynta. Hadien 79 snem ba ioh laitluid, Nga sngew tieng namar kane ka Bill. Ka kyndon 16-A jong ka Amendment Bill ka long kaba ima bha bad ym lah satia ban pdiang ia ka” ula ong.
Ula ai ka jingiaroh ia ka Congress namar ka jingkhang lynti ia ka Bill ha Parliament.
“Lada ym dei na ka jingpyrshah ka Congress ia ka FCRA Amendment Bill ha ka Dorbar ba dang shu dep ka Parliament, kane ka bill kan jin da kylla long ka Act mynta bad Ngam tip kaei ka ban jia ia ki khristan ba rit paid. Ka Congress kala ieng skhem ha ka nongrim ban pyrshah ia ka Bill bad dawa ba dei ban weng noh ia ka” ong u Dr Kharlukhi.
“Namar kane, Nga la rai ban kyrshan ia ka congress namar lada ngi kwah ban iada ialade, ngi hap ban pynkhlain ia ka congress hangtei. Lada don u Bah Pala hangtei, kin don haduh 98, kin don haduh 99, sa uwei u briew u ban iakhun pyrshah ia ka Bill” ula ong.
U Dr Kharlukhi uba la tei ia ka NPP na ki 2 ngut ki MLA ban ioh synshar ia ka Jylla kum u State President la 17 snem naduh ka por jong ka NCP, ula kyntait ban kynnoh iano iano ruh halor ka jingmih noh jong u na ka NPP.
Haba kylli la un pyniasoh noh sha ka Congress, ula ong “Ka por kan sa batai. Ynda ngi la poi ha jingkieng, ngin sa iajam sha shiliang ka jingkieng. Nga long uba iai shah” .
