Itanagar, Risaw 24: Ki jingïakhih pyrshah ïa ka jingthmu ban tei ïa ka dam jong ka Upper Siang Multipurpose Dam ki la pynkhihwin ïa ka Pasighat ha Arunachal Pradesh East Siang district ha ka miet jong ka sngi Thohdieng, ha kaba ki nongïakhih ki la hiar thma ïa ki ïing sah jong ki nongïalam saiñ hima sima, ki la thang ïa ka ophis jong ka NHPC bad ka Police Station, bad ki la thang ïa ki hynniew tylli ki kali pulit.
Ka jingkulmar ba la khlem sangeh haduh 4 baje eiei mynstep jong ka sngi saitjaiñ, ha kaba ki ïing bad ki jaka sah jong ki MLA Ninong Ering bad Oni Panyang, kumjuh ruh u state president ka BJP u Kaling Moyong ki la shah thombor bad shah pynjulor.
La iathuh ba katei ka jingkulmar, ka la mih hadien ka jingkynnoh ba ki bor pahara, ki la siat da ki bom pynsat khmat, ia ki nongkyrshan jong ka pakhang shnong ha Geku, Upper Siang district, ha kaba saw ngut ki kynthei, ki la mynsaw jur.
Ki nongïakhih, kynthup ïa ki nongïakhih kiba dei ki samla, kila dawa ruh ban pyllait noh ïa ki 10 ngut ki briew kiba la shah kem ha ki jingïakhih ba kham mynshwa pyrshah ïa ka jingthmu ban tei ïa ka dam heh.
Ka jinglong jingman ka la nang jur shuh shuh namar ba ki nongiakhih ki la pyndonkam da kaba siat maw bad thang ding, da kaba thmu ia ki jaka treikam sorkar bad ki pulit ha Pasighat.
Ka projek ba la aiti ha Upper Siang Multipurpose Project, kaba la aiti ha ka National Hydroelectric Power Corporation (NHPC), ka la mad ïa ka jingpyrshah kaba jur na ki nongshong shnong halor ki jingsngewkhia kiba ïadei bad ka dam kaba heh bha.
Ka jingshah thombor kaba thymmai ka la pynjur ïa ka jingïakynad halor kane ka projek, ha kaba ki jingïakhih halor ka jingkynnoh ba la pyndonkam da ki lyer pynsat khmat bad ka jingshah set ïa ki nongïakhih ki la pynlong sha ka jingthang bad thombor ïa ki jaka paidbah bad ki jaka riew shimet.
