Kyrpad u Pema Khandu ia ki sengbhalang ban wan iakren ba mih ka jingiakynad ha Pasighat

ITANAGAR, Risaw 24: U Myntri Rangbah ka Jylla Arunachal Pradesh u Pema Khandu u la kyrpad ban iakren bad ki sengbhalang kiba pyrshah ia ka Siang Upper Multipurpose Project (SUMP) hadien ba la mih ki jingjia pynjulor, lute bad thang ding ha Pasighat hadien ka jingkhot pakhang shnong ban pyrshah ia kane ka jingthmu projek.

Katei ka jing iakynad, ka la mih hadien ba ka jingpakhang shnong kaba 12 kynta hapoh ka distrik Siang, Upper Siang bad East Siang, ka la kut ha ka sngi Thohdieng, kaba la bteng haduh ki por mynstep jong ka sngi saitjain, ha kaba ki jingjia, ki la iathuh haduh kumba 3.30 eiei, ong u Khandu.

Ki jaka ba la shah thombor ki kynthup ïa ka Pasighat Police Station, ka Adi Baane Kebang (ABK) complex bad ka ophis jong ka NHPC.Ki ïing sah jong ki MLA ka thaiñ u Oni Panyang bad u Ninong Ering, kumjuh ruh u state president ka BJP u Kaling Moyong, ki la shah pynjulor bad shah pynpra, ha kaba la mih khubor ba ki don ki jinglute bad ki jingtuh.

U Khandu u la ong ba ka pakhang shnong ka la neh ha kaba bun ki jaka ha ka Siang district bad Upper Siang bad ha Pasighat ha ka shisngi, hynrei ki jingjia hadien ba la pynkut ia ka ki long ki jingjia kiba sngewsih.

Haba u la kam ia ka hok ban iakhih da kaba jai jai, u la ong ba ki jingiakhih ki dei ban neh hapoh u pud u sam jong ka ain bad kim dei ban wanrah ia ka jingpynjot ia ki mar ki mata ne pynthut ia ka shongsuk shongsain ki paidbah.

Halor ka jingpyrshah ïa ka SUMP, u Myntri Rangbah ka Jylla u la ong ba ka sorkar jylla ka kloi ban pynlong ïa ka jingïakren bad ki seng bad ki nongmih khmat jong ki paidbah ban bishar bniah ïa ki jingmyntoi kiba lah ban mih na kane ka projek, ki jingktah kiba lah ban mih bad ki jingsngewkhia ba la pynpaw da ki trai shnong.

“Ki jingkhang jong ka sorkar ki plie beit.Kano kano ka seng ne ka kynhun kaba kwah ban iakren ia ka projek SUMP la pdiang sngewbha”, u la ong da kaba kyntu ia ki nongshim bynta ban wad jingshai lyngba ka jingiatreilang beit.

U Khandu u la ong ba ka sorkar ka la iakynduh ia ki nongdon bynta bad khot ia ki ban iashim bynta ha ki jingialang.U la tyrwa ban iakynduh ia ki nongmih khmat na ka thain Siang ha Itanagar, Pasighat ne kano kano ka jaka kaba pynsuk ia ki.

U la pynpaw ruh ba u kwah ban leit jngoh ia kawei ka jaka ba la tyrwa da ki nongshim bynta, ryngkat bad ki ophisar na ki tnad ba dei peit, ban iakren ia kane ka projek.

Da kaba pynkynmaw biang ba ka jingïasngewthuh jingmut jong ki paidbah kan long ka pdeng ban pyniaid ïa ka projek shakhmat, u Khandu u la kyntu ïa ki seng bad ki nongmihkhmat jong ki paidbah ban ïashim bynta ha ki jingïakren ha ka miej ban weng ïa ki jingsngew artatien bad ban pynshai ïa ki jingartatien.

U la ong ba ia ki jingiapher jingmut halor ka projek dei ban pynbeit lyngba ka jingiakren bad ki rukom synshar paidbah ban ia ki kam kiba buh jingma ia ka jingshngain jong ki paidbah bad ia ka suk ka sain.

U myntri rangbah ula kyrpad ia baroh ki nongshim bynta ban pynneh ia ka jingsuk bad ban iatreilang ha ka rukom kaba tei bad ka sorkar halor kane ka jingthmu ban shna ia ka project.