Shillong, Risaw 23: Ym shim la don wat tang uwei u samla pule ka Meghalaya uba la paw kyrteng ha ka Provisional List ne thup kyrteng jong ki 48 ngut ki samla pule na ka bynta ka B.Sc. Nursing ha North Eastern Indira Gandhi Regional Institute of Health and Medical Sciences (NEIGRIHMS) na ka bynta ka samoi pule jong u snem 2026-27, kaba la pynlong syndon ia ka Hynñiewtrep Youths’ Council (HYC) ban dawa ban don noh ia ka bhah kaba kyrpang na ka bynta ka Jylla.
Ha ka dorkhas kaba la phah sha u Director ka NEIGRIHMS, ka Council kala ong ba katei ka thup kyrteng kaba la pynmih ha ka 7 tarik u Nailur 2026 kala iehnoh ia ki samla kiba don jingthrang ban yn ym ioh ‘Seat’ ha katei ka jaka pule jong ka Sorkar Pdeng kaba don ha Shillong.
Ka HYC kala ong, ba ka burom ia ka jingwan shakhmat jong ki samla pule bad ia ka kyrdan ka NEIGRIHMS hapoh ka ri, hynrei kala pynpaw pat ba ki samla pule ka Meghalaya kidei ban ioh ia ka kabu kaba don jingmut kaba ka bym noh shilliang ha la ka jong ka Jylla.
Kala kyntu ia ka Institute ban pdiang ha kaban bhah kyrpang kaba long kum ha RIMS, Imphal bad ka jingbhah kaba la don lypa na ka bynta ki samla pule MBBS ka Meghalaya ha NEIGRIHMS.
Ka Council kala dawa ba dei ban shimkhia ia kane ka mat ha ka jingialang jongka Governing Council Meeting kaban long ha ka 27 tarik u Risaw, ban wanrah ia ka jingbhah kyrpang na ka bynta ka Jylla bad ban wanrah ia ki jingpynkylla kiba kongsan ha kaba iadei bad ki kyndon ban pdiang ia ki samla pule.
Kum katei ka sienjam, kan iarap ha kaban pynbha ia ka lad ban ioh ia ka jingpule ha ki kyrdan kiba heh na ka bynta ki samla trai ri trai muluk bad kan iarap ha kaban tei ia ka sap ka phong jongki nongtrei ha ka liang ka koit ka khiah ha Meghalaya, ka HYC kala ong, ba ka kyrmen skhem ba ki bor kiba dei khmih kin pynthikna ba ki samla trai ri trai muluk kiba dei hok kin ym shah iehnoh shadien.
