Shillong, Oct 22: Ka Nongkseh Sport & Cultural Club kala khur ia ka jingjop da kaba pynrem da 4–1 ia ka Kuppuraj FC ha ka jingiakhun ha ka sien kaba nyngkong eh ha ka I-League 3, ha SSA Football Stadium hynne ka sngi Palei bad ka jinglah ban ialehkai bha jong ka Nongkseh ha ka kylla miet, kala pynlong ia ka ban ioh khur ia katei ka 3 point.
U Owanijuh Pajuh ula ioh thep ia ka kol kaba nyngkong ha ka minit kaba 38 bad hadien kane u kapten ka Nongkseh u Hardy Cliff Nongbri ula thep ar kol ha ka minit kaba 50 bad 55. U Ieitlang Syiemlieh ula thep ia ka kol kaba 4 ha ka 58 minit, katba u Jaymz Bryan Pale ula ioh thep ia ka shi kol na ka bynta ka Kuppuraj ha ka minit kaba 88.
Ka jingiakhun hapdeng kine ki ar tylli ki kynhun kala long kaba iakhaid mar ia sdang hynrei hadien ba ka Nongkseh kala ioh ia ka kabu ha ka minit kaba 5 ban thep kol, hynrei ia katei ka bol la ioh ban iada noh da u nongapkol ka Kuppuraj.
U Kapten ka Nongkseh u Hardy Nongbri ula ialam nakhmat ia ka khynhun ban tur shakhmat bad ha ka minit kaba 23 la ioh ia ka kabu kaba biang tam ban thep kol lyngba ka jingshut ia ka Corner Kick, hynrei u Kynsailang ula pyndei da ka khlieh ia ka bol bad kala leit dei beit beit ia u dieng kol bad mih noh shabar.
Dei ha ka minit kaba 38 ba u Kynsailang ula pynbuh ia ka bol kaba biang bha ia u Owanijuh Pajuh uba la thep ia ka kol khlem da pynlehnoh ei bad pynthikna ba ka Nongkseh kan ioh ban tam da shi kol.
Hashwa ban kut noh ka kylla step, ka Kuppuraj kala pyrshang ban thep kol lyngba ka jingshut ia ka Corner Kick hynrei ki nongialehkai shadien jong ka Nongskeh kila ioh ban shut noh ia ka bol ban lait na kano kano ka jingma jong ka jingshah thep kol. Ka Nongkseh kala ioh ruh ia ka lad ha ka minit kaba 44 ha kaba u Hamedamanbha ula shut ia ka bol hynrei kam shim la leit rung pat shapoh kol, kumta ka jingiakhun ha ka kylla step kala kut tang da ka jingthep shi kol da ka Nongkseh.
Ha ka kylla miet, ka Nongkseh kala ialehkai bha bad u Hardy Nongbri ula ioh ban thep 2 kol ha ka minit kaba 50 bad 55 bad kane kala buh syndon ia ka Kuppuraj ha ka jingeh kaba khraw ban ioh pynphai kylla.
Watla ka Nongkseh kala tam lypa da 3 hynrei kam shim la khein sting hynrei kala iai bteng ban tur shakhmat bad kala ioh ban thep ia ka kol kaba 4 ha ka minit kaba 58 lyngba u Ieitlang Syiemlieh.
Hadien ka jingioh thep 4 kol, ka Nongkseh kala pynshong noh ia ki 5 ngut ki rangialehkai bad kala pynmih bujli noh da kiwei pat. U Shano Tariang uba la pynmih ula pyrshang la bunsien ban shut na jngai ia ka bol hynrei u nongap kol ka Kuppuraj ula ioh ban iada ia ka bol ban rung shapoh kol katba don pat ki bol kiba la shut kila leit sharud.
Ka Kuppuraj hapdeng jong ka jingshah thep kol kala iai bteng ban iakhun tyngeh bad shwa ban wai ka jingiakhun ha ka minit kaba 88 kala ioh thep ia ka kol lyngba u Jaymz Bryan Pale hadien ba kala don ka jingkynrun kynram ki nongialehkai shadien jong ka Nongkseh. U Kynsailang Khongsit ula thmu ban ai ia katei ka bol sha u nongap kol ka Nongkseh u Wanteilang Malngiang, hynrei u Pale ula ioh ban knieh noh ia katei ka bol bad thep syndon ia ka shi kol na ka bynta ka Kuppuraj.
Wat haduh shwa ban kut ka jingiakhun, ka Nongkseh kala bteng ban tur shakhmat bad kala pyrshang ruh ban thep kol hynrei u nongialehkai shaiden jongka Kuppuraj kila ioh ban iada noh ban ym ailad ban shah thep kol shuh shuh.
Ha ka 24 tarik u Risaw, ka Kuppuraj FC kan iakhun pyrshah ia ka Lakecity FC ha ka por 9 baje mynstep katba ka Chhaygaon FC kan iakhun pyrshah ia ka Nongkseh S&CC ha ka por 5 baje janmiet.
