Shillong, Risaw 22 : Ka Tnad Pulit kala pan shuh shuh ia ki bor pahara ka Sorkar Pdeng hadien ka jingjia kawang petrol bomb hapoh ka ophis ka Enforcement Directorate ha Shyiap hynne ka step sngi Palei, ka sien kaba saw ba jia kum kawei ka jingjia ha Shillong ha kine ki 48 kynta bala leit noh.
Kat kum ka jingiathuh ki Pulit, ki runar kila kawang petrol bomb ha ka Ophis ka ED bad hap hapoh ki mawkyndon ban rung shapoh ka Ophis. Ym shym la don mano mano ruh ba mynsaw.
Ka Shillong kala sakhi ia ki bun tylli ki jingjia kawang petrol bomb naduh ka sngi Ba-ar, kaba kynthup ha Kench’s Trace, Keating Road bad Laitumkhrah.
Haba kren sha ki nongthoh khubor, u Superintendent of Police (City) Bah Dangsan Khyriem ula kubur ba kane ka jingthombor kala jia wat hapdeng ki jingtalasi bad pahara kaba la pynkhlain.
“Watla ngi la buh ia ki jaka talasi bad ka jingiaid pahara man ka sngi ha baroh ki jaka kiba hap hapoh ka sor Shillong bad ha khapsor, ki dang don hi ki jingjia kawang petrol bomb hynnin ka sngi ha Langkyrding hynrei ym shym la don kano kano ka jingjulor” ula ong.
Haba pynpaw ba yn nang pynkhlain shuh shuh ia ka jingiaid pahara, ula ong “Ngin dang pynbteng ia ka jingbuh ia ki jaka talasi bad ngi la pan ruh ia ki bor pahara ka Sorkar pdeng naduh mynta ka sngi bad ngi lah ban ioh ia ki ha kine ki khyndiat sngi ban wan”.
Halor ka jingiaid ka jingtohkit, u Bah Dangsan ula ong “Ngi dang thwet ia ki runar kiba donkti ha lyntdet kine ki jingkawang patrol bomb”.
Haba kylli haduh katno pyrton ki bor pahara bala pan, ula ong “Ngi la thoh mynta ka sngi bad ngin sa peit haduh katno ngin ioh”.
