Gambegre, Risaw 22 : U Myntri Rangbah ka Jylla Conrad K Sangma ha ka sngi Palei, ula plie paidbah ia ka Block Integrated Development Complex ba T. 3 klur ha Gambegre Community and Rural Development (C&RD) Block ha West Garo Hills, haba pynpaw ia ka jingpyrshang jong ka Sorkar ban pynbha ia ki jingtei ha ki jaka nongkyndong bad ban wanrah ia ka jingshakri ka Sorkar shajan u paidbah.
Ia u Myntri Rangbah la synran da ka kurim bad MLA ka Gambegre Dr Mehtab Chandee A Sangma bad ka Aking Nokma ka Gambegre Chekme Ch Marak, kaba la noh synniang ia ka jaka na ka bynta ka complex. U Conrad ula pynkup burom ruh ia ka Marak halor ka synniang bad kala iashimbynta lang ha ka jingot ia u ribbon.
Ha kane ka jingleit iuhkjat, u Myntri Rangbah ula plier uh ia ka Digital Library ba dang shu shna thymmai bad ka ATM ka State Bank of India (SBI) hapoh kane hi ka complex.
Haba ai jingkren, u Myntri Rangbah ula ong ba ka Sorkar kala rai ban kyntiew kyrdan ia ki Block Office hadien ka jingiohi ia ka jingduna ki jingtei ha ka jingleit jurip jong u ha kylleng ki jaka ka Jylla.
“Ha ka jingleit iuhkjat jong nga ha kylleng ki jaka jong ka Jylla, Nga la sakhi ia ki jingtei kiba la rim ha ki Block Office, kaba lam sha kane ka jingpyrkhat kaba thymmai. Ka jingthmu ka long ban ai ia baroh ki jingshakri ia u paidbah-kynthup ka jing ai ia ki caste certificate bad EPIC card-na kawei ka jaka lyngba ka technology” ula ong.
U Myntri Rangbah ula pynbna ruh ba shen yn sa buh ia ka CM Connect Centre ha Gambegre complex. Kane ka centre kan iarap ia ki nongshongshnong ba kin ioh ia ki welfare scheme bad ba kin ioh ban pyntip ia ki jingeh da ka jingthoh.
Ka Gambegre complex ka dei shibynta jong ka prokram bala sdang pyntreikam ha u snem 2022-23 ban kyntiew kyrdan ia baroh 56 tylli ki C&RD Block ha Meghalaya.
Na ki 40 tylli ki Integrated complex bala mang ha u 2022-23, haduh 34 tylli lah dep ban pyntrei pura katba hynriew tylli ki dei kiba la jan dep artad. Ka ri-lum Garo ka don haduh 17 tylli napdeng ki 40 tylli ki complex.
Haba ai jingkren, ka MLA ka Gambegre Dr Mehtab Chandee A Sangma kala kren halor ka jingkongsan ki Ophis jong ki Block ban ai ia ka jingshakri jong ka Sorkar sha ki longiing ha ki nongkyndong.
“Ki block office ki dei ki ophis ba nyngkong eh ban iakynduh hapdeng ki longiing ha nongkyndong bad ka Sorkar” kala ong bad bynrap “U Myntri Rangbah ula sbun shisha ban pyntrei ia kane ka project ba kongsan ha kaban kyntiew kyrdan ia man ki ophis jong ki block ha kylleng ka jylla Meghalaya”.
