Shillong, Risaw 16: Da kaba kynnoh ba ki don ki kam bym hok kaba jur bha ha ka jingai Trading Lisence sha ki ki briew ki bym dei ki riewlum ha ka kyrteng jong ka jingiatreilang bad ki riewlum, ka Khun Hynñiewtrep National Awakening Movement (KHNAM) ka la dawa na ka KHADC ban pyndam noh ia 44 tylli kum kine ki laisen.
Ha ka shithi sha u CEM ka KHADC bah Winston Tony Lyngdoh, u Working President ka KHNAM Bah Thomas Passah u la ong ba ka seng ka la ioh lyngba ka RTI ïa ki kopi jong ki 44 tylli ki laisen ba la ai sha ki briew bym dei ki riewlum kiba pyniaid ia ki kam khaii da ka jingiatreilang bad ki riewlum trai ri trai muluk.
Haba ia dei bad ka jingkren jong u CEM ha ka Council hynniew bnai mynshwa ba la ai laisen ia uwei u Bawri na ka bynta ban pyniaid ia ka jaka ieng kali paidbah hadien ba u la iatreilang bad uwei u riewlum, u Bah Passah u la ong ba ki jubab RTI ki pynpaw ia ki jingpynkhein kiba jur bha.
“Kano kano ka kam/khaii kaba la pynïaid da ka jingïatreilang ka hap ban iaid katkum ka kyndon jong ka Indian Partnership Act, 1932, Companies Act 1956, Limited Liability Partnership Act 2008.La bthah ruh ia baroh kum kine ki kompeni ban pynrung kyrteng katkum ka ain bad ka kyrteng jong baroh ki partner ka donkam ban don ha register jong ka kompeni,” u la ong.
Hynrei haba wad ia ki kopi ba la pynskhem jong ki kot pynshisha jong kine ki kompeni, u Bah Passah u la ong ba ka jubab jong ka Council ka pyni ba ym don uwei ruh uba don ia ki kot pynshisha kumba la bthah da ka ain.
“Kaba mut ba kim dei ki kompeni ba iatreilang katkum ka kyndon jong ki Act ba la kdew haneng.Haba bishar bniah ia kine ki Trading Laisen, la lap ba ka jingmyntoi jong u riewlum shimet ka long kaba duna bha, kaba pynlong ia ngi ban ngeit ba ia u paralok riewlum la shu pyndonkam tang ban ioh ia ka trading laisen,” u la ong.
Shuh shuh u la pynpaw ba ki kompeni ki la ai tang ia ka affidavit jong ka jingkular hapdeng ki riewlum bad ki bym dei ki riewlum, katba ia ka kyrteng jong u riewlum ym shym la pynrung kyrteng kum u paralok ne partner.
Napdeng ki lisence ba la buh kyrteng ki long ka Green Clift Resort, Jendrina Hospitality LLP, Megha Automotive LLP, Sani Steels Pvt Ltd, Premier Mega Hub, Jubilant Food Works Ltd (Domino’s Pizza), Dream House Luxury Living LLP, Sati Resort, HPT Orchid Resort,
Meghalaya Brewing Company, Meghalaya Polymers bad kiwei kiwei.
Da kaba khot ia katei ka jingpynbeit kum ka Benami, ka KHNAM ka la ong, “Baroh ki laisen ba la ai da ka council na ka bynta ka kam/khaii pateng kaba la pyniaid da ka jingiatreilang hapdeng ki bym dei ki riewlum bad u riewlum ha ka jingshisha ka dei ka kam kaba la pyniaid ha ka Benami kaba long pyrshah ia ka Benami Transactions Prohibition) Act, 1985 bad kaba lah ban pynshitom katkum ka kyndon 3 jong Act.”
Ka party ka la kyntu ia ka Council ba ka dei ban leh eiei mardor.
“Da kaba pynshong nongrim ia ki jingshisha ba la kdew haneng ngin kyntu ia ka council ban pynduh noh ia kine ki laisen baroh bad ban kiar na kum kine ki rukom treikam ki ban long tang ka lad ia ki bym dei ki riewlum ban shim ia ka kam khaii ha ka Jylla.Lada donkam ia ki kam pynbeit kam shym la sdang da ka council mardor ngin pynbor ban gujor kumba la bthah da ka 4(a) jong ka ain,” ong u Bah Passah.
