Shillong, Risaw 15: Ka Mawlai Sports Club, kaba dang shu ioh rah ia ka nam lahduh jong ka Shillong Premier League kan hiar madan biang sa shisien ba kan iakhun pyrshah ia ka Nongkseh SSCC, ha ka semifinal ba nyngkong jong ka lympung SSA Super Cup 2026, kaban long lashai ka sngi ha SSA Stadium, ha ka por 5 baje janmiet.
Kane ka jingialehkai kan sei madan ia kawei na ka jingiakhun hapdeng ki artylli ki kynhun kiba kynsai bad la khmih lynti ba kin sei madan ruh ia ka jingiakhun kaba itynnad, iakhaid bad ka thong hi ka long ba kine ki ar kynhun ki ia beh sha ka thong ka nam ka burom.
Hadien ka jinglah ban ioh ban rah ia ka nam kum ka lahduh ka SPL, ka Mawlai SC ka la ap lypa ialade sha ka semifinal ryngkat bad ka Shillong Lajong FC, kaba wan ba-ar (runners-up), ka ban iakhun pyrshah ia ka MLP FT ha ka semifinal kaba ar kaban long ha ka sngi Saitjain.
Haba phai sha ka kynhun ialehkai ka Nongkseh, ka kynhun ka la lah ban bat ia ka kyrdan kaba lai ha kaba kut ka SPL, kaba pynlong ia ka kynhun ba kan hap ban iaid lyngba ka playoff. Ha ka jingialehkai plafoff, ka Nongkeh kala pynliem ia ka Sawme SC da 4-2 kol.
Kane ka jingiakhun, kan dei ka kabu ia ka Nongkseh ba kan iakhun ban ioh ia ka khur ia ka jingjop, hynrei ka Mawlai, khlem pep kan ialeh ban pynskhem ialade kum ka kynhun kaba tbit bad kaba khlain, kaba hangne lah ruh ban ong ba kan khring bha ia ki khmat u paidbah uba ieit bad ba sngewtynnad ia ka phutbol.
