Shillong, Risaw 15: Ka jingiakren hapdeng ka sorkar jylla bad ki nongiakhih pyrshah ia ka Shillong Ropeway Project ka khlem poi shaei shaei ruh ha ka sngi Palei, ha kaba ka Joint Action Committee Against Shillong Ropeway Project kala pynpaw ba kan iai bteng ia ka jingiakhih tad haduh ban da pynsangeh ia ka project ha Lum Shyllong.
Hadien ka jingialang kaba la lum da ka Commissioner & Secretary ka Tnad Jngohkai Kong RM Kurbah, ka Secretary ka JAC Dr Linda Marbaniang kala ong, ba ka committee kala rai ban iaid shakhmat bad ka jingiakhih.
“Ngim shim la lah ban rai eiei ha ka jingialang bad ka Tnad Tourism. Kum ka JAC, ka khubor ka jong ngi ka long kaba shai bad kaba khlain, ngin ym sangeh ia kane ka jingiakhih. Ngi kwah ba dei ban pynsangeh noh mardor ia ka ropeway project” ong ka Dr Marbaniang.
Kala ong ba ka Shillong ka donkam ia ka jingshngain ia ka um, ym da ka ropeway ha ka jaka ba don ki tyllong um.
“Ki paitbah ka Shillong ki kwah ia ka um. Ngim kwah ia ka ropeway ha Lum Shyllong. Rah ia katei ka project shawei pat kaba ki paitbah ki donkam. Ka jingkwah mardor ka jong ngi ka dei ka um, ym ia ka ropeway,” kala ong.
Haba kynnoh ba ka project kan ktah ia ka mariang, kala ong “Ki lah pynjulor ia u Lum Shyllong bad kila pynkhyllem ia ki dieng. Ngi hap ban long kiba peitbniah. Ngi lah duna lypa haduh 60% ia u slap ha Meghalaya. Kane kadei ka jingtip kaba ia tip lut bad kadei ka jingshisha. Ngim donkam ban pynsngewthuh eiei shuh halor kane”.
Ka Dr Marbaniang kala ong, “Ngi na Laban Pyllun ngi kyrpad ia ka sorkar ba kan sngap lem ia ngi. Ngi lah mad jingeh bad ki khun jong ngi bad ki pateng ban dang wan ruh kin mad jingeh. Naei ngin ioh um, ka lyer kaba khuid, ki dawai kynbat na ki khlaw? Shaei ki mrad kin sah? Sngap lem ia ngi, ngim kwah ba ka Ropeway kan don hangtei.”
Ka JAC kala khot ia ka rally paitbah kaba jaijai ha ka 17 tarik u Risaw na Last Stop, Laban sha Sericulture Farm, Lum Shyllong.
“Ngi kyrpad ia baroh ki nongshong shnong ka Shillong ban iasnohkti lang bad ngi ha kane ka jingiaid kaba jaijai. Ngim kwah ban mih kano kano ka huri hura. To ngin ia iaid lang ban burom ia u Blei uba la ai ha ngi ia u Lum Shyllong bad uba la ai ia kiei kiei baroh ia ngi,” kala ong.
Ka Dr Marbaniang lala buh jingkylli ruh ia ka jingduna ha kaban pynlong ia ka public hearing, da kaba ong, “Haba la sdang ia ka project, ngim.don jongtip eiei. Kam don kano kano ka public hearing. U Rangbah Shnong um shim la pyntip eiei ia ngi. Ngi lah shu iohi ia ka jingpynkhyllem ia ki dieng. Hadien jong ka PIL, la pynsangeh ia ka kam bad la bteng biang, kaba la pynbor ia ngi ban shim ia ki sienjam.”
Haba kyntait ia ki jingkam ba kan ym don jingktah ia ka catchment area, kala ong, “Lada phi ot bad pynkhyllem ia ki dieng, yn ym don slap bad lada ym don slap ka mut ym don um. Kadei kaba la iatip paitbah. Ka Shillong mynshwa kam ju mad ia ka jingkhluid. Ka jingbteng jong ka jingslap kaba 7-9 miet kaba ngi ju iohi kala jah noh namar ka jingpom ia ki dieng”
Haba pyrshang ban iakren bad ka Commissioner & Secretary ka tnad Toursim ka Kong RM Kurbah kala kyntait ban kren eiei halor ka jingmih jong kame ka jingialang.
