Shillong, Risaw 15 : Ka Hynniewtrep Youth Council (HYC) kala shimkhia bha ia ka jingbym poi ka umbam umdih sha ki kor um jong ka skhim Jal Jeevan Mission (JJM) ha ka shnong Kher Jatap bad Lum-u-Smon kaba hap hapoh ka Shella Sub-Division ha kine ki saw-saw bnai bala lah.
Ha ka dorkhas sha u SDP, PHE, Shella ha ka sngi Palei, kaba la soi da u Vice President ka HYC Shella B Natep bad President ka HYC Jatap P Shongwan, ka seng kala pynpaw ba kine ki shnong kila mad ia ka jingeh kaba khraw namar ka jingbym poi um.
“Ki nongshongshnong ka Kher Jatap bad Lum-u-Smon kim shym la ioh um lyngba ka skhim JJM la 4-5 bnai. Ka jingbym ioh um kaba neh slem, kala buh ia ki ha ka jingeh kaba khraw ban pynbiang ia ka umbam umdih bad kiwei ki jingdonkam ba man ka sngi” kala ong.
Ka HYC kala kdew ba ka jingthmu jong ka JJM kala shah jop noh lada ki shnong ki thaw kim ioh um da ki bnai.
“Haba don ki skhim kum ka JJM ban pynioh um, hynrei ki briew ki hap ban mad jingeh da ki bnai, ka pynmih ia ka jingartatien ia ka rukom treikam bad ka jingpeit ia ka rukom sam um hapoh ka skhim” ong ka HYC.
Haba dawa ban leh eiei noh, ka Council kala ong “Ngi kyrpad ia phi kum u Ophisar ba dei khmih ia ka PHE Shella Sub-Division ban khmih kyrkieh ia kane ka kam, pynlong ia ka jingleit jurip ha Kher Jatap bad Lum-u_Smon, wad ia ki daw tynrai ka jingbym poi um bad maramot ia kiba sniew”.
Kala dawa ruh ia ka tnad ba kan pynbiang ia kiwei pat ki lad ban pynioh um sha kine ki shnong bad ong “Ngi kyrpad ruh ba dei ban pynbiang biang ïa ka jingsam um khlem jingthut, bad lada donkam por ban maramot ia ki tiar kiba sniew, dei ban pynbeit ïa ki lad ban sam um shipor lyngba kiwei pat ki rukom tad haduh ban dep ka kam”.
