Nongpoh, Risaw 13: U Deputy Commissioner (DC) ka Ri Bhoi ha ka 13 tarik Risaw, u la kular ban rah ïa ka jingeh jong ki paidbah halor ka jinglip bording kaba khah ha Nongpoh sha ka Meghalaya Energy Corporation Limited (MeECL), bad ban pynlong ruh ïa ka jingïalang kaba kyrpang ban wad ïa ki lad ki lynti ban pynbeit ïa kane ka mat.
Kane ka jingkular ka la wan hadien ba ka Khasi Students’ Union (KSU), Nongpoh Circle, hapoh ka jingïalam u General Secretary, u Baiashan Kharshanlor, ka la leit ban ïakynduh ïa u DC ban pynsngew ïa ka jingeh ba ki paidbah ka Nongpoh bad ki thaiñ marjan ki mad iaka jingeh na ka jinglip bording ba khah khah.
Ka KSU ka la pynpaw sha u Deputy Commisioner ka Ribhoi, ba ka jingdawa ban pynbiang ïa ka bording bad ban tei ïa ka substation kaba 132/33 kV ha Nongpoh kam dei kaba dang thymmai. Ka Seng ka la ïathuh ba kane ka jingdawa ka la mih naduh u snem 2012, ha kaba ka seng, ryngkat bad kiwei ki seng bad ki rangbah shnong, ki la pynsngew ïa kane ka mat.
Ka KSU ka la pynpaw ruh, Wat hadien ba la pynkynmaw biang ïa kane ka jingdawa lyngba ka memorandum bad ka rally kaba la long ha ka 3 tarik u Naiwieng, 2023, hynrei ka jinglip bording ka ba khah khah ka dang ïai bteng haduh mynta.
Ka KSU ka la ong ba ka jingthut jong ka bording kaba man la ka sngi ka la wanrah ïa ka jingeh kaba khraw ym tang ïa ki nongshong shnong hynrei ka la ktah ruh wat ïa ki kam khaii pateng, ki jaka pule bad kiwei kiwei ki bynta jong ka imlang sahlang.
Haba jubab ïa ka jingpynsngew jong ka seng, u DC u la pynpaw ba ïa kane ka jingeh ym lah ban pynbeit noh tang hapoh shisngi. Hynrei, u la kular ban ïakren bad buddien ïa kane ka kam bad ka MeECL, bad ban pynlong ïa ka jingïalang hakaba yn sa khot lang ïaki ophisar ka District Administration, ki nongmihkhmat ka MeECL bad ki nongïalam ka KSU ban ïa kren ban wad iaki lad ki lynti ban pynbeit ia kane ka jingeh.
Haba kren naka liang u Secretary Ka KSU Nongpoh Circle, u Baïashanlang Kharshanlor u la ong ba ka jinglip jong bording ha Nongpoh ka la long kum ka jingïalehkai ïa rieh, ha kaba ka bording ka ju lip bad wan khlem kino kino ki daw kiba biang.
U Bah Kharshanlor la ong, ba wat la ka seng ka la pyrshang bunsien ban pynsngew ïa kane ka jingeh sha ki bor shynshar District, hynrei haduh mynta ym pat don ka jingpynbeit kaba thikna.
U la pynpaw ruh ba ki dukan rit bad ki kam khaii pateng ki la hap ban mat jingeh bad bun ka jinglut na ba ki hap ban pyndonkam ïa ki generator khamtam ki khynnah pule kiba pynkhreh ïa ki eksamin ki hap ban mat iaka jingeh kaba khraw naka jingbym neh tikna ka bording.
U Bah Kharshanlor u la buh ruh ka jingkylli, “Lada ka Sorkar ka kyntu ïa ki samla ban seng ïa ki kam lajong, kumno kin lah ban trei lada kim ioh ïaka bording kaba tikna ha ka por ba ki donkam?”.
Shuh shuh ka seng ka la buh ruh ïa ka jingkylli, balei ba ka Nongpoh ka hap ban mad ïa ka jinglip bording khah khah ban ïa ki thaiñ kiba bun ki karkhana kum ka Umiam bad Byrnihat?
Ka seng ka la ban jur ba kum ka Head Quarter jong ka District, ka Nongpoh ka donkam ïa ka bording kaba tikna bad kaba lah ban shaniah na ka bynta ki ophis sorkar, ki skul, ki hospital, ki kam khaii pateng bad kiwei kiwei ki jingshakri paidbah.
Kharduh, u bah Kharshanlor u la pynpaw ba ka KSU ka khmih lynti ba ka jingïalang ka ban sa pynlong kan wanrah ïa ki rai kiba shai, ryngkat bad ki lad ki lynti kiba tikna ki ban pynbeit ïa kane ka mat, khnang ba yn lah nam weng noh ia kane ka jingeh jong ki paidbah kiba ki la hap ban mat mynta la kumba 13 snem
