Shillong, Risaw 13 : Ka Nongkseh ka la lah ban ia ksaid tyngeh na ka liew lep ba ka la liat ban pynliem ia ka Sawmer SC da 4-2, ha ka jingiakhun ia ka playoff ba nyngkong ka lympung ialehkai ka SSA Super Cup, ba la long ha SSA Stadium, hynne ka nohphai sngi.
Ia ki kol ka Nongkseh SSCC la thep da u Hardy Cliff Nongbri (54’, 71’) bad Shano Tariang (67’, 69’), katba ia ki artylli ki kol ka Sawmer SC la thep da u Khrawkupar Tamu (37’P) bad na u Bickyson Kharkongor (57’).
Da kane ka jingjop ka pynlong ia ka Nongkseh SSCC ba kan jam pat sha ka semifinal ha kaba kan khreh ba kan iakhun pyrshah ia ka lahduh ka SPL 2026 ka Mawlai SC kaban long ha ka sngi Thohdieng jong ka taiew.
Ka jingioh ban thep ka Sawmer ia ki kol kadei ba la kyrsoi ka mynsiem iakhun na kane ka kynhun, , ha kaba u Bickyson u la ioh ia kawei ka kabu ksiar ban shut jam bha ia ka bol bad u Daraphun Talang rang ap kol ka Nongkseh u la hap ban khmih bniah bha ia kane ka bol ha shwa ba un ioh ban kyrda ia ka ban pyllait na ka jingman.
Hadien kane, ka Sawmer ka la ioh ia ka kabu ba kan shut ia ka penalty, kaba hangne u Khrawkupar u la tur shakhmat bad ban shut na kyndong bad nalor bha ia ka bol ban pynkhih ia ka jar.
Hadien kane, ka Nongkseh ka la pyrshang ba kan wanphai biang ialade sha ka thong iakhun hadien ba ka la shem bad iohi ba ka kynhun ialehkai ka Sawmer ki la ieng iakhun tyngeh bha ha kane ka kynti, bad hapoh shiphew minit ka kylla miet, ba ka la ioh ia ka kabu kaba paka ban pynphai ia kane ka shi kol ba ka la shah tam lyngba u Hardy.
Katba ka Nongkseh ka dang mut dur ba ka la lah ban tehlakam ia kane ka jingiakhun, jrain khih biang ka jar ka jong ka, hadien ba u Bickyson u la shut jam ia ka bol kham na kyndong bha ka diengkol bad ka bol kluk ka la lah ba kan rung beit shapoh ka kol.
Pynban ym slem ba ka kynhun ialehkai ka Sawmer SC ba kim lah ban bteng ia la ka sur ialehkai kaba khlain ka jong ki, katno tam lei lei hadien ba la pynrung madan ia u Shano bad u Chesterpaul, kaba hangne shu dain bad dain ka Nongkseh ka la lap ba ioh ban thep ia ki kol ki jong ka.
Ka dawbah ia ka Sawmer SC ban shah thep ka dei ba ka defend line ka jong ka kam shim la lah ban ieng iada pura ia la ka kut ialehkai ka jong ki tad haduh ba kin hap ban pdiang pat ia kane ka jingshah rem bad kaban dei artad ka jingiakhun kaba khatduh ia ka ha kane ka samoi ialehkai ba mynta ka snem.
Ka jingiakhun ia ka playoff kaba ar kan dei pat lashai ka sngi hapdeng ka Langsning FC pyrshah ia ka Meghalaya Police FT, bad kiba jop na kane ka jingiakhun kin khreh ban iakhun pat ia ka semifinal kaba ar pyrshah ia ka Shillong Lajong FC kaban long ha ka sngi Saitjain jong ka taiew.
